Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 515 Hüküm no: 699 Orijinal metin no: [90b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mosi v. Odya’nın, Ahmed Bîcân b. İbrahim’de olan alacağını babası Odya’nın Ahmed Bîcân’a olan borcuna mahsup ettirdiği Ma‘rûz Mahmiye-i İstanbul’da Balıkpazarı hâricinde sâkin yapağı tüccârından arzuhâl eden Mosi v. Odya nâm Yahûdî meclis-i şer‘-i enverde yine mahmiye-i merkūmede Yedikule hâricinde debbağ olup derûn-ı arzuhâlde mezkûrü’l-ism Ahmed Bîcân b. el-Hâc İbrahim nâm kimesne muvâcehesinde bundan akdem mezbûr Ahmed Bîcân’ın yedime verdiği bir kıt‘a deyn temessüğü mantûkunca mezbûr Ahmed Bîcân’a târih-i i‘lâmdan üç sene mukaddem kendi menzilimde malımdan karz olmak üzere vermişidim deyü kendiden iddi‘â eylediğim beş yüz guruşu işbu hazır bi’l-meclis babam Odya v. Mosi Yahûdî’nin mezbûr Ahmed Bîcân yedinden iştirâ ve kabz eylediği iki yüz altmış dokuz kantar yapağı bahâsından zimmetinde olan bin yedi yüz kırk sekiz buçuk guruş deyninin ol mikdârına bi’t-terâzî takās ve mahsûb eylediğimde ol dahi mukāssa ve kabûl edip meblağ-ı müdde‘â-bih-i merkūm beş yüz guruşdan mezbûr Ahmed Bîcân’ın yed ve zimmetinde bir akçe ve bir habbe alacağım kalmayıp bu vechile meblağ-ı merkūm beş yüz guruşu ahz ve istifâ etmemle ben meblağ-ı merkūm beş yüz guruşa müte‘allika âmme-i da‘vâdan mezbûr Ahmed Bîcân’ın zimmetini ibrâ-i âm ile ibrâ ve ıskāt ol dahi ibrâyı kabûl eyledi lâkin mezbûr Ahmed Bîcân’ın mârrü’z-zikr temessüğü Ağakapısı’nda kethudâyeri ağanın yedinde zâyi‘ olmağla ba‘de’l-yevm temessük-i mezbûr zuhûr edip kendiden bir şey taleb ve da‘vâ olunur ise lede’l-hükkâm mesmû‘a ve makbûle olmasın dedikde babası mesfûr Odya ve mezbûr Ahmed Bîcân dahi mukırr-ı mesfûr Mosi Yahudi’yi tasdîk edip bu vechile kat‘-ı nizâ‘ eyledikleri Mahkeme-i Bâb’dan huzûr-ı âlîlerine i‘lâm olundu. Fî 27 min-Rebî‘ülâhir sene 1163