Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 516 Hüküm no: 700 Orijinal metin no: [90b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuşadası’nın Yaya köyünden Ali b. Mustafa ve Ali b. Mehmed’in köylerinde subaşı vekilliği yapmış olan Ali Ağa b. Ahmed’in kendilerinden haksız yere para aldığı iddiasıyla açtıkları davayı ispat edemedikleri Ma‘rûz Kuşadası’na tâbi‘ Çangıllı kurâlarından Yayla karyesi ahâlîsinden olup mahmiye-i İstanbul’da müsâfiren sâkinler olan sahib-i arzuhâl Ali b. Mustafa ve diğer Ali b. Mehmed nâm kimesneler meclis-i şer‘-i enverde derûn-ı arzuhâlde mezkûrü’l-ism âhar Ali Ağa b. Ahmed muvâcehesinde mezbûr Ali Ağa bin yüz altmış iki senesi târihinde karye-i mezbûrede subaşı vekîli olan merkūm âhar Ali Ağa benden bi-gayr-ı hakkın cerîme nâmıyla nakid otuz guruş ile beş guruş kıymetli bir çilterimi aldı deyü da‘vâ ve mezbûr diğer Ali dahi târih-i mezkûrda merkūm âhar Ali Ağa benden bi-gayr-ı hakkın cerîme otuz altı guruşumu aldı deyü da‘vâ eylediklerinde ol dahi külliyyen inkâr eyledikde mezbûrân Aliler ber-vech-i muharrer müdde‘âlarını beyâna kādirler olmayıp bi’t-taleb merkūm âhar Ali Ağa’ya vech-i şer‘î üzere yemîn verilmeğin mûcebiyle müdde‘iyân-ı mezbûrân Aliler bilâ-beyyine [91a] merkūm âhar Ali Ağa’ya bî-vech mu‘ârazadan men‘ olundukları Mahkeme-i Bâb’dan huzûr-ı âlîlerine i‘lâm olundu emr ü fermân hazret-i veliyyü’l-emrindir. Fî 27 min-şehri Rebî‘ülâhir sene 1163