Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 88 Hüküm no: 57 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karahisar-ı Şarki’deki Seyyid İsmail Efendi’nin vakfettiği cami, han ve değirmen vakfının tevliyetinin Seyyid el-Hâc Salih’e tevcihi Ma‘rûz, Sâdır olan fermân-ı âlîlerine imtisâlen işbu arzuhâl ve merbût olan diğer arzuhâl ve derkenârlara nazar ve mütâla‘a olundukda medîne-i Karahisar-ı Şarkī’de vâki‘ ashâb-ı hayrâtdan müfti-i sâbık merhûm es-Seyyid İsmail Efendi’nin kendi mâlıyla mahallesinde müceddeden binâ eylediği câmi‘-i şerîfi evkāfından hân ve değirmen vakfının ber-mûceb-i vakfiye-i ma‘mûlün-bihâ tevliyeti karındaşının batnen ba‘de batnin evlâd ve evlâd-ı zükûruna ve senevî hâsıl olan kalanı dahi beş sehm kılınıp humusu mütevellîsine ve bâkīsi sâir mürteziklarına meşrûta olmağla tevliyet-i mezkûrenin bin yüz otuz iki senesi Muharremi’nin yirmi dördüncü günü bâ-ruûs-ı hümâyûn ve ber-mantûk-ı vakfiye-i me’mûlün-bihâ müceddeden Anadolu Muhâsebesi’ne kayd ile ber-mûceb-i şart-ı vâkıf evlâd-ı zükûr birâder-i vâkıfdan es-Seyyid Hasan’a tevcîh ve yedine şurût-ı mezkûreyi mutazammın berat-ı âlîşân i‘tâ olundukdan sonra evlâd-ı zükûr-ı vâkıf münkariz oldu deyü mezbûr Seyyid Hasan’ın kasr-ı yedinden bin yüz seksen dört senesi Şevval’inin dördüncü günü ecânibden es-Seyyid el-Hâc Ahmed Halîfe’nin dahi kasr-ı yedinden sene-i mezbûre Zilka‘de’sinin yirmi dokuzuncu günü es-Seyyid Hüseyin Halîfe v. Hasan’a tevcîh olunup ba‘dehû mezbûr es-Seyyid Hüseyin Halîfe dahi fevt olmağla mahlûlünden bin iki yüz yirmi iki senesi Receb’inin altıncı günü oğlu es-Seyyid el-Hâc Salih Halîfe’ye tevcîh olunup ba‘dehû mezbûr es-Seyyid el-Hâc Halîfe dahi fevt olmağla mahlûlünden bin iki yüz yirmi beş senesi Zilhicce’sinin ikinci günü birâderzâdesi es-Seyyid Abdurrahim Halîfe’ye tevcîh olunup ba‘dehû mezbûr es-Seyyid Abdurrahim Halîfe fevt olmağla mahlûlünden bin iki yüz kırk beş senesi Ramazan-ı şerîfinin on beşinci günü es-Seyyid Mehmed Kâmil’e tevcîh olunup el-yevm üzerinde ve câmi‘-i şerîf-i mezkûr vakfının vazîfe-i mu‘ayyene ile tevliyet ve nezâret cihetlerinin kadîmden kaydolmayıp bin yüz yirmi üç senesi Zilka‘de’sinin beşinci günü şart-ı vâkıf üzere akrabâ-i vâkıfdan es-Seyyid Ali Halîfe’ye müceddeden kayd ile tevcîh olunup üzerinde iken fevt olmağla mahlûlünden bin yüz kırk beş senesi Şevval’inin yirmi altıncı günü ber-mûceb-i şart-ı vâkıf akrabâ-i vâkıfdan es-Seyyid Hasan Halîfe’ye tevcîh olunup el-yevm üzerinde olduğu Anadolu muhâsebesi derkenârından müstebân keyfiyeti gereği gibi etrâfıyla tahkīk için kazâ-i mezbûr ahâlîsinden bu esnâda Der-aliyye’ye gelen İsmail Zühdü Efendi b. el-Hâc Hâfız Ömer ve es-Seyyid Hasan Efendi b. el-Hâc Hüseyin ve Sakalar Kethudâsı es-Seyyid Hüseyin Ağa b. İbrahim ve Kayıkçı Hasan b. İsmail ve Mustafa b. Halil nâm kimesneler meclis-i şer‘a celb ile suâl olundukda vâkıf-ı mûmâ-ileyh es-Seyyid İsmail Efendi mahalle-i mezbûrda binâ eylediği câmi‘-i şerîfi levâzımına müsakkafât-ı ma‘lûme bedîhet ettikten sonra hân ve değirmen ve hammâm vakfetmiş olmağın ol vechile cümlesi bir vakıf olup hatta bir def‘a sebkat etmiş ise de bin yüz kırk beş târihinden berü iki tevliyet olmak üzere tevcîh sebkat etmeyip yalnız bir berat ile mutasarrıf olunageldiği ve vakf-ı mezkûrun ve humus galle ile tevliyeti dahi ber-mûceb-i vakfiye ma‘mûlün-bihâ dahi câmi‘-i şerîf tevliyeti lafzıyla ...? batnen ba‘de batnin evlâd-ı evlâd-ı zükûruna meşrûta olup amel-i kadîm dahi bu vechile cârî olarak sâlifü’z-zikr hân ve değirmen ve hammâm tevliyetine müceddeden kayd ile ve câmi‘-i mezkûr tevliyetine dahi akrabâ-i vâkıfdan es-Seyyid Ali Halîfe’nin kasr-ı yedinden evlâd-ı zükû[r]-ı birâder-i vâkıfdan mezbûr es-Seyyid Hasan Halîfe bi’l-meşrût mutasarrıf iken ecânibden es-Seyyid el-Hâc Ahmed Halîfe’ye kasr-ı yed ettikde bu makūle meşrûta tevliyeti ecânibe kasr-ı yed kendi zamanki kasr-ı yed olup gayrin zamanında meşrû‘ ve mu‘teber olmadığından ve mezbûr es-Seyyid Hasan Halîfe’nin sulbî oğlu es-Seyyid Hâfız Hüseyin mevcûd olmağla pederi vefâtından sonra zabta kādir olduğundan medâr-ı takviyet olur zu‘muyla kasr-ı yed beratına zâid nev‘inden olarak evlâd-ı zükûr münkariz oldu ta‘bîri dahi ilâve kılınmış ise de mezbûr es-Seyyid Hasan Halîfe fevt oldukda sulbî sahîh oğlu es-Seyyid Hâfız Hüseyin Halîfe babası mahlûlünden tevliyet-i mezkûreyi şer‘an bi’l-meşrûta zabteyleyeceğini ve müteveffâ-yı mezbûrun kasr-ı yedi fâide vermeyeceğini mezbûr es-Seyyid el-Hâc Ahmed Halîfe cezm ve teyakkun eylediğinden tevliyet-i mezkûreyi rızâsıyla meşrûtun-lehi mezbûr es-Seyyid Hâfız Hüseyin Halîfe’ye kasr-ı yed edip ol vechile kad vesale’l-hakku ilâ-ehlihî mefâdı üzere hak yerini bulduktan sonra mezbûr es-Seyyid Hüseyin Halîfe fevt oldukda tevliyet-i mezkûre sulbî oğlu es-Seyyid el-Hâc Salih’e tevcîh olunup. [14b-15a boş]