Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 90 Hüküm no: 58 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ankara’nın Ahî Hacı mahallesi camii imamet cihetinin Seyyid Ömer b. İsa’ya tevcihi Hüve’l-Kerîm Hâlâ revnak-tırâz-ı mesned-vâlâ-yı sadâret-i Anadolu Melek Paşazâde devletlü inâyetlü semâhatlü veliyyü’n-ni‘am Abdülkadir Beyefendi hazretlerinin zamân-ı meyâmin-iktirânlarında olan senedât-ı şer‘iye kuyûdudur Fî-gurreti Z sene 1248 Ma‘rûz-ı dâ‘î-i Devlet-i aliyyeleridir ki, Sâdır olan fermân-ı âlîlerine imtisâlen işbu arzuhâl ve derkenâr ve ruûs-ı hümâyûndan yazılan muktezâ cevâbına nazar ve mütâla‘a olundukda vilâyet-i Anadolu’da Ankara kazâsında Ahî Hacı mahallesinde kâin câmi‘-i şerîfin vazîfe-i mu‘ayyene ile imâmet cihetine mutasarrıf olan es-Seyyid Ali b. es-Seyyid Veliyüddin bilâ-veled fevt, mahlûlünden ashâb-ı arzuhâl es-Seyyid Ömer b. İsa ve es-Seyyid Osman b. Ahmed dâ‘îleri nısfiyet üzere kendülere tevcîhini istirhâm etmeleriyle cihet-i mezbûre el-yevm bâ-berât-ı âlî mezbûr es-Seyyid Ali’nin üzerinde olduğu askerî rûznâmçesi derkenârında müstebân olmağla ve fi’l-hakīka müteveffâ-yı mezbûrun bilâ-veled vefâtı kazâ-i mezbûr ahâlîsinden Der-aliyye’de müsâfireten sâkinler Seyyid Mustafa b. Salih ve İdris b. Halil nâm mevsûku’l-kelim kimesnelerin ale’ş-şehâde ihbârlarıyla zâhir ve mütehakkık olmağın bu sûretde Osman karye-i âharda sâkin olup es-Seyyid Ömer b. İsa câmi‘-i şerîf mahâllinde sâkin ve ehliyet ve istihkākı nümâyân olmağla cihet-i mezbûr bilâ-veled müteveffâ-yı mezbûrun mahlûlünden es-Seyyid Ömer b. İsa dâ‘îlerine tevcîh ve yedine berat-ı şerîf-i âlîşân sadaka ve ihsân buyurulmak muktezâ-yı hâl idiği huzûr-ı âlîlerine i‘lâm olundu. Fî 23 Zilhicceti’ş-şerîfe sene 1248