Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 518 Hüküm no: 703 Orijinal metin no: [91a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Osman’ın rehin verdiği kuşaklarını geri vermesi talebiyle Ekmekçi Avanis v. Mardiros’a açtığı davayı ispat edemediği Ma‘rûz Zâtı ta‘rîf-i şer‘î ile mu‘arrefe olan sahibe-i arzuhâl Fâtıma bt. Osman nâm hatun meclis-i şer‘-i enverde ekmekçi tâifesinden derûn-ı arzuhâlde mastûrü’l-ism Avanis v. Mardiros zimmî muvâcehesinde târih-i i‘lâmdan üç buçuk ay mukaddem mesfûr Avanis zimmînin yedinden ve malından istikrâz ve ahz u kabz eylediğim yedi guruş deynim mukābelesinde mesfûr Avanis zimmîye rehin olmak üzere otuz dokuz buçuk dirhem çift işi iki başlı bir sîm kuşak ve yirmi bir dirhem yaldızlı iki başlı bir sîm kuşağımı def‘ ve teslîm etmişidim hâlâ deyn-i mersûm yedi guruşu mesfûr Avanis yedimden ahz ile kendiye rehin deyü medfû‘um olan mârrü’z-zikr kuşaklarımın aynıları mevcûde ise aynılarını müstehlek ise ba‘de’s-sübût kıymet-i şer‘iyelerini mezbûr Avanis zimmîden taleb ederim deyü ba‘de’d-da‘vâ ve’l-inkâr müdde‘iye-i mezbûre Fâtıma Hatun ber-vech-i muharrer müdde‘âsını bir vechile beyâna kādir olamayıp talebiyle mesfûr Avanis zimmîye vech-i şer‘î üzere yemîn verilmeğin mûcebiyle müdde‘iye-i mezbûre Fâtıma Hatun bilâ-beyyine-i âdile mesfûra bî-vech mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 28 min-şehri Rebî‘ülâhir sene 1163