Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 519 Hüküm no: 705 Orijinal metin no: [91a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Odya v. Mosi ile çocukları Mosi ve Kemal’ın yapağı ve alacak iddiasıyla Ahmed Bîcân b. Hacı İbrahim’e açtıkları davada birbirleriyle olan alacak-verecek hesaplarında sulh olup zimmet ibrası yaptıkları Ma‘rûz Derûn-ı arzuhâlde mezkûr yapağı tüccârından Odya v. Mosi nâm Yahûdî meclis-i şer‘-i enverde Yedikule hâricinde vâki‘ debbağ tâifesinden sahib-i arzuhâl Ahmed Bîcân b. el-Hâc İbrahim nâm kimesne muvâcehesinde kıbel-i şer‘-i enverden yedimize i‘tâ olunan hüccet-i musâlahada tafsîl ve beyân olunduğu vech üzere mezbûr Ahmed Bîcân’a yapağı vermek için bi’d-defa‘ât ben ve oğullarım hâzırân bi’l-meclis Mosi ve Kemâl yedlerimiz ile ve Vâlide Hanı’nda sâkinler Sarrâf Mıgırdıç ve şerîki Agop nâm zimmîlerden havâle tarîkıyla medfû‘um olan cem‘an yekûn bin yedi yüz altmış üç buçuk guruş hakkımın bin yüz guruşu mukābelesinde iki yüz altmış dokuz kantar yapağı verip altı yüz kırk sekiz buçuk guruş ile yirmi beş kantar yapağım mezbûr Ahmed Bîcân’ın yed ve zimmetinde bâkī kalmağla bâkī-i merkūm ile mârrü’z-zikr yirmi beş kantar yapağıyı Ahmed Bîcân’dan taleb ve da‘vâ eylediğimde ol dahi beher kantarı altı buçuk guruşa olmak üzere yedimden iştirâ ve kabz ve istihlâk eylediği iki yüz altmış dokuz kantar yapağım bahâsı bin yedi yüz kırk sekiz buçuk guruşun bin yüz guruşunu yedinden ba‘de’l-ahz ve’l-kabz altı yüz kırk sekiz buçuk guruşu zimmetinde bâkī kalmağla meblağ-ı bâkī-i mezkûru taleb ederim deyü benden da‘vâya tesâddî etmekle beynimizde münâza‘ât-ı [91b] kesîre cereyân etmişidi el-hâletü hâzihî bâ-vesâtet-i muslihîn mezbûr Ahmed Bîcân ile da‘vâ-yı mezkûremden on üç kantar bedel-i makbûza sulh olup iddi‘â eylediğim meblağ-ı bâkī-i merkūm altı yüz altmış yedi buçuk guruşa ve mâ‘adâ on iki kantar yapağıya ve târih-i i‘lâma gelince husûs-ı sâireye müte‘allika âmme-i de‘âvî ve kâffe-i mutâlebât ve eymân ve muhâsamâtdan ben ve oğullarım hâzırân-ı mesfûrân Mosi ve Kemâl mezbûr Ahmed Bîcân’ın zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimizde ol dahi benden tesâddî eylediği altı yüz kırk sekiz buçuk guruş da‘vâsından meccânen fâriğ olup meblağ-ı mezbûra ve bedel-i sulh olmak üzere bana medfû‘u olan on üç kantar yapağıya ve târih-i i‘lâma gelince husûs-ı sâireye müte‘allika âmme-i de‘âvî ve kâffe-i mutâlebât ve eymân ve muhâsamâtdan benim ve oğullarım hâzırân-ı mesfûrân Mosi ve Kemâl’in zimmetlerimizi ibrâ-i âmm-ı kātı‘u’n-nizâ‘la ibrâ ve ıskāt eyledikde herbirimiz âharın vech-i meşrûh üzere ibrâsını kabûl ile kat‘-ı nizâ‘ eyledik deyü olan ikrârını oğulları hâzırân-ı mesfûrân Mosi ve Kemâl ve mezbûr Ahmed Bîcân dahi tasdîk eyledikleri Mahkeme-i Bâb’dan mübâşirleri Ebûbekir Çavuş kulları ile huzûr-ı âlîlerine i‘lâm olundu. Fî 27 Rebî‘ülâhir sene 1163