Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 520 Hüküm no: 706 Orijinal metin no: [91b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Divan çavuşlarından Osman Ağa b. Veliyüddin’in alacak iddiasıyla Çukadar Ömer Ağa b. Abdullah’a açtığı davada sulh olup birbirlerinin zimmetlerini ibra ettikleri Ma‘rûz Dîvân-ı âlî çavuşlarından sahib-i arzuhâl Osman Ağa b. Veliyüddin meclis-i şer‘-i enverde derûn-ı arzuhâlde mezkûrü’l-ism Çukadâr Ömer Ağa b. Abdullah muvâcehesinde bundan akdem mezbûr Ömer Ağa’ya Duhan gümrüğü mukāta‘ası malından almak üzere müceddeden etdirdiğim yevmî kırk iki akçe vazîfesinin buyurulmasına ve beratına ve sâir mesârif-i lâzımesine mezbûrun emri ile malımdan bi-şarti’r-rücû‘ altı yüz otuz guruş masrûfum olup meblağ-ı mezbûrun iki yüz guruşunu yedinden ahz u kabz eyleyip dört yüz otuz guruş mezbûr Ömer Ağa’nın zimmetinde bâkī kalmağla meblağ-ı bâkī-i mezbûru mezbûr Ömer Ağa’dan taleb ederim deyü da‘vâya tesâddî ve bâ-tavassut-ı muslihîn mezbûr Ömer Ağa ile an-inkâr seksen guruş bedel-i makbûza sulh olup mâ‘adâ üç yüz altmış guruşa ve sâireye müte‘allika âmme-i da‘vâdan mezbûr Ömer Ağa’nın zimmetini ibrâ ve ıskāt eylediğimde ol dahi bedel-i sulh deyü bana medfû‘u olan meblağ-ı mezbûr seksen guruşa ve sâireye müte‘allika âmme-i da‘vâdan benim zimmetimi ibrâ ve ıskāt edip herbirimiz âharın vech-i muharrer üzere ibrâsını kabûl ile kat‘-ı nizâ‘ eyledik deyü olan ikrârını mezbûr Ömer Ağa dahi tasdîk eylediği Mahkeme-i Bâb’dan huzûr-ı âlîlerine i‘lâm olundu. Fî-gurreti Cemâziyelevvel sene 1163