Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 521 Hüküm no: 708 Orijinal metin no: [91b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borcundan dolayı hapsedilen Mustafa Reis b. Mehmed’in borcunu taksitler halinde ödemek üzere alacaklısı Ekmekçi Süleyman b. Mehmed ile anlaştıkları Ma‘rûz Hâmiş-i arzuhâlde mezkûrü’l-ism mahbûs medyûn Mustafa Reis b. Mehmed’in dâyini olup derûn-ı arzuhâlde mezkûr Ekmekçi Süleyman b. Mehmed meclis-i şer‘de merkūm Mustafa Reis zimmetinde bâ-i‘lâm-ı şer‘î mahkûmun-bih hakkım olan kırk üç buçuk guruşu merkūm Mustafa Reis’in hâlen ve def‘aten edâya iktidârı olmayıp tecîl ve taksîte tâlib olmağla ben dahi meblağ-ı mezkûrun on buçuk guruşunu târih-i i‘lâm şehri hitâmında verip ba‘dehû beher otuz günde dahi üçer guruş verip târih-i i‘lâmdan on iki ay tamamında meblağ-ı mezkûru bana tamamen edâ etmek üzere merkūmu tecîl ve taksît eylediğimde ol dahi vech-i meşrûh üzere mukāssaten edâya ba‘de’t-ta‘ahhüd meblağ-ı mukāssat-ı mezkûrun vech-i mezkûr üzere edâsına zâtları ta‘rîf-i şer‘î ile mu‘arrefeler olan işbu hâzıretân bi’l-meclis Havva bt. Abdullah ve Rukiye bt. Osman nâm hatunlar dahi kefîller oldu deyü olan ikrârını medyûn-ı merkūm Mustafa Reis ile mezbûretân Havva ve Rukiye’den herbiri tasdîk eyledikleri Mahkeme-i Bâb’da ba‘de’t-tescîl Muhtâr Çavuş kulları ile huzûr-ı âlîlerine i‘lâm olundu. Fî 2 Ca sene 1163