Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 521 Hüküm no: 709 Orijinal metin no: [91b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yelkenci Yani, Dimitri, Yuvan ve diğer gemicilerin gemisinde çalıştıkları ı İbrahim b. Ali’de alacakları olduğu iddiasıyla açtıkları davayı ispat edemeyip davanın reddedildiği Ma‘rûz Mellâh tâifesinden ashâb-ı arzuhâl Yelkenci Yani v. Dimitri ve Dimitri v. Yuvan ve Yani v. Dimitri ve Yuvan v. Melkon ve Panayot v. İstefan ve Foti v. Kiryako ve Kostantin v. Todori ve Yuvan v. Niko ve Lefter v. Todori nâm zimmîler meclis-i şer‘de Kapıkethudâsı Ömer Beşe mübâşeretiyle ihzâr-ı şer‘ ettirdikleri derûn-ı arzuhâlde mezkûrü’l-ism Hacı İbrahim b. el-Hâc Ali muvâcehesinde sefînesinde âriyeten reis olan Mehmed Reis hazır olduğu hâlde bundan akdem mezbûrânın volik ta‘bîr olunur sefînelerine seksen keyl leşid kavliyle Âsitâne’den Akkirman’a ve ondan yine Âsitâne’ye gelince yedi ayda eylediğimiz her seferde leşidimizden otuz guruş hâsıl olmuş iken mezbûr Hacı İbrahim yirmişer guruş yüzer akçe vermekle ziyâde dokuzar guruş yirmişer akçemizi taleb ederiz deyü herbiri ba‘de’d-da‘vâ mezbûr Hacı İbrahim mezbûrûnun kendi sefînesinde ancak beş ay hizmetlerini ve ber-vech-i muharrer leşid kavli ile olduğunu ikrâr ziyâde iki ay [92a] hizmetlerini ba‘de’l-inkâr müdde‘iyûn-ı mesfûrûn ziyâde müdde‘âlarını isbât edemeyip mezbûr Hacı İbrahim bi’t-taleb ba‘de’t-tahlîfi’ş-şer‘î mezbûrûnun leşid kavli ile îcâr ve istîcarları fâsid olup şer‘an ecr-i misli iktizâ etmeğin müdde‘iyûn-ı mezbûrûnun ecr-i misilleri beher mâh dörder guruş olup ve me’hûzları olan yirmişer guruş yüzer akçe dahi beş ayda iktizâ eden ecr-i misillerine müsâvî olduğu bâ-fermân-ı âlî ehl-i hibreleri olan Abdullah Kapudan ve sâir bî-garaz rüesâ haberleriyle müte‘ayyin olmağın mûcebiyle müdde‘iyûn-ı mezbûrûn mellâhlar mezbûr Hacı İbrahim’e bi-gayr-ı vech-i şer‘î mu‘ârazadan men‘ olundukları Mahkeme-i Bâb’dan huzûr-ı âlîlerine i‘lâm olundu. Fî 3 min-Cemâziyelevvel sene 1163