Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 90 Hüküm no: 59 Orijinal metin no: [15b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Antalya’nın İstanos kasabasındaki Cumaönü Camii Evkafı tevliyetinin Seyyid Mustafa Efendi’ye verildiği Ma‘rûz-ı dâ‘î-i Devlet-i aliyyeleridir ki, Sâdır olan [fermân-ı] âlîlerine imtisâlen işbu arzuhâl ve derkenâra nazar ve mütâla‘a olundukda Antalya kazâsı muzâfâtından İstanos kasabası mahallâtından Cum‘anü demekle ma‘rûf el-Hâc Mehmed’in binâ eylediği câmi‘-i şerîf evkāfının vazîfe-i mu‘ayyene ile tevliyeti Abdurrahman b. Osman’ın üzerinde iken fevt olmağla yeri hâlî ve hizmet-i lâzımesi mahlûl olduğundan bahisle es-Seyyid Mustafa b. Osman dâ‘îleri kendüye tevcîhi istid‘â-yı inâyet etmeğin tevliyet-i mezkûr mezbûr Abdurrahman’ın el-yevm bâ-berât-ı âlî üzerinde olduğu askerî rûznâmçesi derkenârından müstebân ve fi’l-hakīka müteveffâ-yı mezbûrun bilâ-veled fevtiyle sahib-i arzuhâlin umûr-ı vakfı idâre ve rü’yete muktedir olduğunu kazâ-i mezbûr ahâlîsinden Der-aliyye’de müsâfiren sâkinler bî-garaz erbâb-ı vukūfdan es-Seyyid Sadullah b. es-Seyyid Osman ve Hüseyin b. Mustafa ale’ş-şehâde haber vermeleriyle bu sûretde tevliyet-i mezkûre müteveffâ-yı merkūmun mahlûlünden sahib-i arzuhâl merkūm es-Seyyid Mustafa dâ‘îlerine tevcîh ve yedine berat-ı şerîf-i âlîşân sudûru re’y-i âlîlerine menût idiği huzûr-ı âlîlerine i‘lâm olundu. Fî 23 Zilhicceti’ş-şerîfe sene 1248