Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 526 Hüküm no: 716 Orijinal metin no: [92b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahsebet b. Yadigar ile kocası Ariton v. Vartan’ın, Ahsebet’in kardeşi olup mahpus bulunan mühtedi Mehmed’de olan eşyalarını teslim alıp zimmetini ibra ettiklerinden hapisten serbest bırakılmasını talep ettikleri Ma‘rûz Mahrûse-i Galata müzâfâtından kasaba-i Beşiktaş’da Sinan Paşa-yı Atîk mahallesinde vâki‘ Yeniodalar demekle ma‘rûf odalarda mütemekkine ve şahsı ta‘rîf-i şer‘î ile mu‘arrefe olan sahibetey-i arzuhâl Ahsebet bt. Yadigar nâm Nasrâniye ile zevci Ariton v. Vartan nâm zimmî Kapıkethudâsı Ahmed Beşe ile meclis-i şer‘-i envere mahbûsen irsâl olunan mesfûre Ahsebet’in li-ebeveyn er karındaşı mühtedî Mehmed b. Abdullah nâm kimesne muvâcehesinde işbu yedimizde olan Beşiktaş Nâibi Mustafa Efendi’nin i‘lâmı mantûkunca bize def‘ ve teslîmine mühtedî-i mezbûr Mehmed’e mukaddemâ tenbîh-i şer‘î lâhık olan yüz dört guruş on para menzilimizden ahz eylediği eşyâ-i müstehleke semenleri ile a‘yânı yedinde mevcûde olup kendinin i‘tirâf eylediği derûn-ı i‘lâm-ı evvelde mezkûr eşyâ-i ma‘lûmemizi mühtedî-i mezbûr Mehmed bize def‘ ve teslîm eylediğinde biz dahi yedinden tamamen ahz u kabz ve tesellüm edip mühtedî-i mezbûrun yed ve zimmetinde bir akçe ve bir habbe alacağımız kalmamağla husûs-ı mezkûrlara ve târih-i i‘lâma gelince husûs-ı sâireye müte‘allika âmme-i da‘vâdan mühtedî-i mezbûrun zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimizde ol dahi ibrâmızı kabûl ile kat‘-ı nizâ‘ eyledik deyü olan ikrârlarını mezbûr mühtedî Mehmed dahi tasdîk eylediği tescîl olundukdan sonra mühtedî-i mezbûr Mehmed’in cürmü afv ve habsden ıtlâk olunmak bâbında fermân-ı âlî ihsân buyurulmasını istirhâm eyledikleri Mahkeme-i Bâb’dan huzûr-ı âlîlerine i‘lâm olundu. Fî 7 Ca sene 1163