Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 526 Hüküm no: 717 Orijinal metin no: [92b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasilako bt. Yorgaki’nin boşandığı kocası Dimitraki v. Morki’de mehir ve çeşitli eşyaları alacağı kaldığı iddiasıyla açtığı davada sulh olup birbirlerinin zimmetlerini ibra ettikleri Ma‘rûz Şahsı Hristo v. Petro ve Yamandi v. Andreya zimmîler ta‘rîfleriyle mu‘arrefe olan sahibe-i arzuhâl Vasilako bt. Yorgaki nâm Nasrâniye meclis-i şer‘de sâbıkā zevci olan Dimitraki v. Morki zimmî muvâcehesinde mezbûr Dimitraki zevc-i dâhilim olup târih-i i‘lâmdan dört ay mukaddem beni tatlîk etmekle zimmetinde mütekarrer ve ma‘kūdün-aleyh yüz guruş mehr-i müeccelim ile eşyâ-i memlûkemden kırk guruş kıymetli bir çift altın bilezik ve yirmi guruş kıymetli bir çift zümrüd küpe ve yirmi beş guruş kıymetli bir altın gerdaniyem mezbûr Dimitraki zimmînin zimmetinde kalmağla mehr-i müeccel-i mezkûr yüz guruş ile eşyâ-i mezkûreleri mezbûr Dimitraki’den taleb ve da‘vâ sadedinde olduğumda ol dahi ba‘de’l-inkâr ve’l-münâza‘a bâ-vesâtet-i muslihîn da‘vâ-yı mezkûremden mezbûr Dimitraki ile an-inkâr on beş guruş bedel-i [93a] makbûza sulh olup hukūk-ı zevciyete ve eşyâ-i mezkûreye ve târih-i i‘lâma gelince sâir beynimizde cereyân eden hukūk-ı ma‘lûme ve mechûleye müte‘allika âmme-i da‘vâdan herbirimiz âharın zimmetini ibrâ-i âmm-ı râfi‘u’l-hısâm ile ibrâ ve ıskāt ve herbirimiz dahi ibrâ-yı mezkûru kabûl eyledik deyü olan ikrârı tasdîkleri Mahkeme-i Bâb’dan huzûr-ı âlîlerine i‘lâm olundu. Fî 6 Cumâdelûlâ sene 1163