Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 91 Hüküm no: 60 Orijinal metin no: [15b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çorum’un Yozgad köyü camii hitabet cihetini elinde bulunduran Derbendîzâde el-Hâc Abdullah’a müdahale edilmemesi Ma‘rûz-ı dâ‘î-i Devlet-i aliyyeleridir ki, Sâdır olan fermân-ı âlîlerine imtisâlen işbu arz ve derkenâra nazar olundukda vilâyet-i Çorum kazâsına tâbi‘ Yozgad karyesinde vâki‘ câmi‘-i şerîfinde yine kazâ-i mezbûra tâbi‘ Çakır karyesinden bir sehm mahsûl ile hitâbet cihetini Osman Bey bilâ-veled fevtinden hilâf-ı inhâ ile üzerine tevcîh ve berat ettiren Seyyid Mustafa’nın ref‘inden bâ-berât-ı âlî mutasarrıf olan kazâ-i mezbûre ulemâsından ve meşâyih-i Nakşibendiye’den Derbendîzâde el-Hâc Abdullah hizmet-i lâzımesinde kusûr etmeyip taraf-ı âhardan müdâhale ve ta‘arruz olunmak lâyık değil iken ashâb-ı ağrâzdan mezbûr Seyyid Mustafa mücerred mukaddemâ üzerinde idi deyü cihet-i mezbûreye hilâf-ı şer‘-i şerîf dahl ve ta‘arruz etmekle müdâhalesinin men‘ u def‘i bâbında bir kıt‘a emr-i âlî niyâzında Çorum nâibi es-Seyyid el-Hâc Ömer Hulusi Efendi dâ‘îleri mührü mutâbık arz etmeğin vâkı‘a hitâbet-i mezkûre vazîfe-i merkūme ile sâbıkā belde-i mezbûre nâibi Seyyid Mustafa’nın ref‘inden bin iki yüz kırk yedi senesi Cumâdelâhiresi’nin yirmi ikinci günü târihiyle sâdır olan fermân-ı âlî mûcebince mezbûr Derbendîzâde Abdullah üzerinde olduğu askerî rûznâmçesi derkenârından müstebân olmağla Seyyid Mustafa’nın cihet-i mezbûreye vech-i muharrer üzere müdâhalesi hilâf-ı şer‘-i şerîf olup müdâhalesinden men‘ u ref‘ [16a] olunmak bâbında belde-i merkūme hâkimine hitâben Derbendîzâde el-Hâc Abdullah dâ‘îleri yedine bir kıt‘a emr-i âlî i‘tâsı mevkūf-ı irâde-i sâmîleri idiği huzûr-ı âlîlerine i‘lâm olundu. Fî 24 Z sene [12]48