Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 529 Hüküm no: 722 Orijinal metin no: [93a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hoşalay kazasının Erkekarpa köyünden Mehmed’in, babasının ölümüne sebep olduğu iddiasıyla aynı köyden Salih b. Şaban’a açtığı davada sulh olduğu Ma‘rûz Vilâyet-i Anadolu’da Kastamonu sancağında Hoşalay kazâsına tâbi‘ Erkekarpa nâm karyede sâkin iken bundan akdem vefât eden Salih b. Kalender’in verâseti zevce-i menkûha-i metrûkesi Sâliha bt. İbrahim nâm hatun ile sulb-ı kebîr oğlu sahib-i arzuhâl Mehmed’e ve sagīr oğlu Mahmud’a münhasıra ba‘dehû zevce-i merkūme Sâliha Hatun dahi vefât edip verâseti sadrî oğulları mezbûrân Mehmed ve Mahmud’a münhasıra olduğu şer‘an zâhir ve müte‘ayyin oldukdan sonra mezbûr Mehmed meclis-i şer‘-i enverde derûn-ı arzuhâlde mezkûrü’l-ism karye-i mezbûre ahâlîsinden diğer Salih b. Şa‘bân nâm kimesne muvâcehesinde kıbel-i şer‘-i şerîfden yedlerine i‘tâ olunan hüccet-i musâlahada tafsîl ve beyân olduğu vech üzere mezbûr Mehmed târih-i i‘lâmdan üç sene mukaddem merkūm diğer Salih babam mezbûr Salih’i karye-i mezbûrede sâkin iken bi-gayr-ı hakkın amden darb ve cerh etmekle üç gün mürûrunda cerh-i mezkûrdan müteessiren vefât eyledi deyü tesâddî eylediği [93b] da‘vâsından bâ-tavassut-ı muslihîn merkūm diğer Salih ile an-inkâr kırk guruş bedel-i makbûza sulh olup husûs-ı mezkûra ve târih-i i‘lâma gelince husûs-ı sâireye müte‘allika âmme-i da‘vâdan merkūm diğer Salih’in zimmetini ibrâ ve ıskāt eyledikde ol dahi bedel-i sulh deyü medfû‘u olan meblağ-ı mezbûra ve sâireye müte‘allika âmme-i da‘vâdan mezbûr Mehmed’in zimmetini ibrâ ve ıskāt eyledikde herbiri âharın ibrâsını kabûl ile kat‘-ı nizâ‘ eyledikleri Mahkeme-i Bâb’da tescîl ve huzûr-ı âlîlerine i‘lâm olundu emr ü fermân veliyyü’l-emr hazretlerinindir. Fî 9 Ca sene 1163