Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 529 Hüküm no: 723 Orijinal metin no: [93b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayıp olan Vasil v. Tamyanos’un işlettiği bezirhanedeki alet ve eşyaların tespit edilip yed-i emine verildikten sonra dükkânın sahibi olan Mehmed Efendi’ye teslim edildiği Ma‘rûz Derûn-ı arzuhâlde mezkûr Ayvansaraykapısı dâhilinde vâki‘ bezirhânede müste’cir olan Vasil v. Tamyanos nâm zimmî bundan akdem firâr ve gaybet-i münkatı‘a ile gāib ve hayat [ve] memâtı ma‘lûm olmayıp bezirhâne mukaffel ve mu‘attal kalmağla sâlifü’l-beyân bezirhânenin mâlik ve mutasarrıfı sahib-i arzuhâl Mehmed Efendi’nin iltimâsıyla bâ-fermân-ı âlî Mahkeme-i Bâb’dan irsâl ve ta‘yîn olunan Başkâtib La‘lîzâde Efendi dâ‘îleri zikrolunan bezirhâne üzerine varıp huzûr-ı Müslimîn’de ba‘de akdi’l-meclisi’ş-şer‘î ve’s-suâl fi’l-hakīka merkūm Vasil’in firârı ve gaybeti ba‘de’t-tahakkuk şîrugancıları kethudâsı Ahmed Ağa b. Ali ve yiğitbaşısı Abdullah Çelebi b. Bektaş ve müsin [ve] ihtiyârlardan cerîdede mazbûtü’l-esâmî kimesneler ile zikrolunan bezirhâneyi feth ve derûnunda mevcûd bulunan revgan-ı bezir ve revgan-ı şîr ve sâir âlât-ı lâzıme ve eşyâsını ba‘de’t-tahrîr ve’t-tahmîn gāib-i mesfûrun hâli mütebeyyin oluncaya değin emîn ve müstakīm ve her vech ile uhdesinden gelmeğe kādirler idiği Müslimîn-i mezkûrîn ihtiyârlarıyla [ihbârlarıyla] müte‘ayyin olup li-ecli’l-hıfz vasî kayyım nasb u ta‘yîn eylediği kethudâsı mezbûr Ahmed Ağa ile Lazari v. Vasil nâm zimmî yedlerine ber-mantûk-ı defterî teslîm ve bezirhâneyi tahliye ve mutasarrıf-ı mezbûr Mehmed Efendi’ye teslîm eylediğini mezbûr kâtib dâ‘îleri mahâllinde ba‘de’t-tahrîr ma‘an mürsel ümenâ ile meclis-i mezbûra gelip alâ-vukū‘ihî inhâ ve takrîr eyledikleri tescîl ve huzûr-ı âlîlerine i‘lâm olundu emr ü fermân veliyyü’l-emr hazretlerinindir. Fî 8 Ca sene 1163