Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 530 Hüküm no: 724 Orijinal metin no: [93b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’in, Hacı Mustafa b. Ali’de olan alacağını taksitler halinde tahsil etmek üzere anlaştığı Ma‘rûz İstanbul’da Şeyh Vefa kurbünde sâkine olup zâtı ta‘rîf-i şer‘î ile mu‘arrefe olan Âişe bt. Mehmed nâm hatun Bâb Mahkemesi’nde meclis-i şer‘de Mumcu Süleyman Beşe mübâşeretiyle ihzâr-ı şer‘ ettirdiği el-Hâc Mustafa b. Ali muvâcehesinde mezbûr el-Hâc Mustafa zimmetinde ber-mûceb-i temessük cihet-i deyn-i şer‘îden üç yüz yirmi guruşdan bâkī iki yüz guruş hakkımı mezbûr el-Hâc Mustafa’dan taleb ve da‘vâ sadedinde iken bâ-vesâtet-i muslihîn altmış guruş ile bir pendül sâ‘at üzerine sulh olup meblağ-ı mezbûrun mâ‘adâsına müte‘allika âmme-i da‘vâdan ba‘de’l-ibrâ bedel-i sulh olan meblağ-ı mezbûrun on guruşu ile mârrü’z-zikr sâ‘ati mezbûr el-Hâc Mustafa yedinden ahz u kabz edip elli guruş bâkī kalmağla meblağ-ı bâkī-i mezbûr elli guruşu mezbûr el-Hâc Mustafa’nın hâlen ve def‘aten bana edâya iktidârı olmayıp tecîl ve taksîte tâlib olduğunda ben dahi mezbûr el-Hâc Mustafa beher otuz gün tamamında bana ikişer guruş verip meblağ-ı mezkûr elli guruşu târih-i i‘lâmdan yirmi beş ay tamamına değin edâ etmek üzere mezbûr el-Hâc Mustafa’yı tecîl ve taksît eylediğimde ol dahi ba‘de’l-kabûl meblağ-ı mukāssat-ı mezkûru müddet-i madrûbe tamamına değin bana edâya ta‘ahhüd eyledi deyü olan ikrârını mezbûr el-Hâc Mustafa dahi tasdîk eylediği huzûr-ı âlîlerine i‘lâm olundu. Fî-gurreti Cumâdelûlâ sene 1163