Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 531 Hüküm no: 725 Orijinal metin no: [93b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ağyazar v. Asvador’un kendisini yaralayıp para ve eşyalarını aldığı iddiasıyla Manol v. Dimitri’ye açtığı davayı ispat edemediği Ma‘rûz Arzuhâl eden Ağyazar v. Asvador nâm zimmî meclis-i şer‘-i enverde derûn-ı arzuhâlde mezkûrü’l-ism Manol v. Dimitri nâm zimmî muvâcehesinde târih-i i‘lâmdan beş gün mukaddem mesfûrun Kumkapı hâricinde kömürcü mahzeni ittisâlinde vâki‘ şerbethânesine vardığımda mesfûr Manol beni bi-gayr-ı hakkın amden bıçak ile başıma darb ve cerh eylediğinden mâ‘adâ alaca kîsem içinde olan mahlût yüz guruş akçemi ve beş guruş kıymetli bir müsta‘mel çuka biniş çuka ve bir guruş kıymetli bir çuka fesimi mesfûr Manol ahz u gasb etmekle mesfûr Manol’dan taleb ederim deyü ba‘de’d-da‘vâ ve’l-inkâr müdde‘î-i merkūm ber-vech-i muharrer müdde‘âsını bir vechile beyâna kādir olmamağla bi’t-taleb mesfûr Manol’a vech-i şer‘î üzere yemîn verilmeğin mûcebince müdde‘î-i merkūm Ağyazar bilâ-beyyine-i âdile mesfûr Manol’a bî-vech mu‘ârazadan men‘ olunduğu Bâb’dan huzûr-ı âlîlerine i‘lâm olundu. Fî 10 Ca sene 1163