Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 531 Hüküm no: 726 Orijinal metin no: [94a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah Hatun bt. Süleyman’ın, Mumcu Molla Halil b. Ömer ve İbrahim b. Hüseyin’deki alacağına kefil olan Tüccar Ali b. Süleyman’a kefaletten dolayı birikmiş ve gelecek taksitlerini de zamanında ödemesi için yapılan tenbih Bâ-mühr-i hazret-i efendi Ma‘rûz Sahibe-i arzuhâl Emetullah Hatun bt. Süleyman nâm hatun zâtı ba‘de’t-ta‘rîfi’ş-şer‘î dîvân-ı âlîlerinde ma‘kūd meclis-i şer‘de arzuhâlde mastûrü’l-ism tüccâr zümresinden el-Hâc Ali b. el-Hâc Süleyman ile terâfu‘larında gāibân ani’l-meclis Mumcu Molla Halil b. Ömer ve İbrahim b. Hüseyin zimmetlerinde cihet-i kefâlet-i şer‘iyeden bâ-i‘lâm-ı şer‘î mahkûmun-bih bin beş guruşdan bâkī sekiz yüz beş guruş hakkımdan mezbûr Molla Halil’in zimmetine iktizâ eden dört yüz iki buçuk guruşun edâsında mezbûr Molla Halil’i târih-i i‘lâm şehrinden yirmi dört ay mukaddem bi’t-terâzî ayda yedi guruş vermek üzere elli dokuz buçuk [guruş] taksît ve tecîl edip ve meblağ-ı mezkûr dört yüz iki buçuk guruşa bi’l-emr ve’l-kabûl kefâlet-i sahîha-i şer‘iye ile işbu mezbûr el-Hâc Ali kefîl ve dâmin olup ve ber-minvâl-i muharrer meblağ-ı mezkûru mukāssaten edâya ta‘ahhüd edip binâenaleyh işbu bin yüz altmış senesi Muharrem’i gāyetine gelince yirmi ayda yüz kırk yedi guruşu bi’l-kefâle bana def‘ ve teslîm edip ol târihden târih-i i‘lâm şehri gurresine gelince üç ayda iktizâ eden yirmi bir guruşu edâda ta‘allül etmekle suâl olunup meblağ-ı mezkûru edâya ve ba‘de’l-yevm dahi her ay tamamında iktizâ eden yedi guruşu bi-hükmi’l-kefâle bana edâya mezbûr el-Hâc Ali’ye tenbîh olunmak matlûbumdur deyü ba‘de’d-da‘vâ ve’s-suâl mezbûr el-Hâc Ali müdde‘iye-i merkūmenin müdde‘âsını mukır ve ber-minvâl-i meşrûh meblağ-ı mezkûr dört yüz iki buçuk guruşa kefîl ve dâmin olduğunu mu‘terif olmağın mûcebince meblağ-ı mezkûr yirmi bir guruşu hâlen ve bâkīsini dahi her ay tamamında yedişer guruş müdde‘iye-i mezbûreye edâ ve teslîme mezbûr el-Hâc Ali’ye tenbîh olunduğu huzûr-ı âlîlerine i‘lâm olundu. Fî 8 Cumâdelûlâ sene 1163