Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 532 Hüküm no: 728 Orijinal metin no: [94a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Teberdar Hacı İdris Ağa b. Abdurrahman’a kalan borçlarını ödemeleri için Şapcı David v. Kanorta ile kardeşleri Avram İsak’a yapılan tenbih Ma‘rûz Teberdâr-ı hâssadan sahib-i arzuhâl hâlâ Sakabaşı Kebîr el-Hâc İdris Ağa b. Abdurrahman b. Abdullah’ın tarafından husûs-ı âti’z-zikri taleb ve da‘vâya vekîl olduğu Mustafa Ağa b. el-Hâc Mehmed ve el-Hâc Abdurrahman b. İsmail şehâdetleriyle sâbit olan Hasan Bey b. Ahmed nâm kimesne meclis-i şer‘-i âlî-kadrde derûn-ı arzuhâlde mezkûrü’l-ism Şapcı David v. Kanorta nâm Yahûdî muvâcehesinde müvekkilim mûmâ-ileyhin yedinde olup yüz altmış iki senesi Receb-i şerîf’inin on beşinci günü târihiyle müverraha bir kıt‘a mümzâ ve mahtûm deyn temessüğü mantûkunca ve târih-i temessükden sekiz ay va‘de ile yüz yirmi bir gün tamamına değin haklaşmak üzere mesfûr David ile li-ebeveyn karındaşları gāibân ani’l-meclis Avram ve İsak’dan herbiri âharın zimmetine lâzım gelen meblağa bi’l-emr ve’l-kabûl kefîl ve dâmin olmak üzere müvekkilim mûmâ-ileyh el-Hâc İdris Ağa yedinden iştirâ ve kabz ve âhara bey‘le istihlâk eyledikleri Hind emti‘ası semeninden dört bin dört yüz doksan guruş müvekkilim mûmâ-ileyhe zimmetlerinde edâsı lâzım deynleri olup mesfûr David deyn-i meblağ-ı mezkûrun beş yüz guruşunu müvekkil-i mûmâ-ileyhe def‘ ve teslîm eyleyip üç bin dokuz yüz doksan guruşu zimmetlerinde bâkī kalmağla meblağ-ı bâkī-i mezkûru bi’l-vekâle mesfûr David Yahûdî’den taleb ederim deyü da‘vâ eyledikde ol dahi cevâbında fi’l-hakīka vekîl-i mezbûrun takrîr-i müdde‘âsı üzere müvekkil-i mûmâ-ileyh el-Hâc İdris Ağa’ya Hind emti‘ası semeni müeccel dört bin dört yüz doksan guruşdan bâkī hâlâ üç bin dokuz yüz doksan guruş zimmetlerinde asâleten ve kefâleten edâsı lâzım deynleri olduğunu ikrâr ve i‘tirâf etmeğin alâ-mûceb-i i‘tirâfihî meblağ-ı bâkī-i mezkûr üç bin dokuz yüz doksan guruşu müvekkil-i mûmâ-ileyh el-Hâc İdris Ağa’ya müddet-i mezkûre tamamına değin bi’t-tamam ve’l-kemâl asâleten ve kefâleten edâ ve teslîme mesfûr David Yahûdî’ye tenbîh olunduğu Mahkeme-i Bâb’dan mübâşirleri Mustafa Çavuş kulları ile huzûr-ı âlîlerine i‘lâm olundu. Fî 13 Cemâziyelevvel sene 1163