Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 533 Hüküm no: 729 Orijinal metin no: [94a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ohrili Ahmed Bey b. Mustafa’ya borcunu ödemesi için Bahçıvan Nikola v. İstoyko’ya yapılan tenbih Ma‘rûz Fi’l-asl vilâyet-i Rumeli’de Ohri kasabası sâkinlerinden sahib-i arzuhâl Ahmed Bey b. Mustafa meclis-i şer‘de derûn-ı arzuhâlde mezkûrü’l-ism bahçevan tâifesinden Nikola v. İstoyko nâm zimmî muvâcehesinde târih-i i‘lâmdan otuz iki ay mukaddem mesfûr Nikola zimmîye kasaba-i mezkûrede kendi menzilimde malımdan yetmiş beş guruş ikrâz ve teslîm edip ol dahi yedimden iktirâz ve ahz u kabz ve istihlâk etmekle hâlâ meblağ-ı mezbûru taleb ederim deyü ba‘de’d-da‘vâ ve’l-inkâr müdde‘î-i mezbûr Ahmed Bey ber-vech-i muharrer müdde‘âsını kasaba-i mezbûre ahâlîsinden lede’t-tezkiye adâletleri zâhir olan Mehmed Beşe b. Mustafa ve Ali Beşe b. Hüseyin şehâdetleriyle mesfûr Nikola zimmî muvâcehesinde vech-i şer‘î üzere ba‘de’l-isbât ve’l-kabûl mûcebiyle meblağ-ı mezkûr yetmiş beş guruşu müdde‘î-i mezbûr Ahmed Bey’e edâ ve teslîme mesfûr Nikola zimmîye tenbîh olunduğu Mahkeme-i Bâb’da tescîl ve mübâşirleri Muhtâr Çavuş kulları ile huzûr-ı âlîlerine i‘lâm olundu. Fî 13 min-Cumâdelûlâ sene 1163