Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 534 Hüküm no: 730 Orijinal metin no: [94b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbetçi Panayot v. Yorgi’nin, Kürkçü İstefani v. Yani ve Yakomi v. Yorgi’de alacağı olduğu iddiasıyla açtığı davada sulh olduğu Ma‘rûz Mahmiye-i İstanbul’da Ayakapısı hâricinde mütemekkin sahib-i arzuhâl Şerbetçi Panayot v. Yorgi zimmî Bâb Mahkemesi’nde meclis-i şer‘de derûn-ı arzuhâlde mezkûr Kürkçü İstefani v. Yani zimmî muvâcehesinde yine arzuhâlde mastûr Yakomi v. Yorgi zimmî hazır olduğu hâlde târih-i i‘lâmdan altı ay mukaddem tomrukdan halâs için işbu Yakomi zimmî yediyle mesfûr İstefani zimmîye bi-tarîkı’r-rüşve doksan guruş def‘ ve teslîm ol dahi ber-vech-i muharrer ahz u kabz etmekle meblağ-ı mezbûru mesfûr İstefani’den taleb ederim deyü da‘vâya tesâddî eylediğimde mesfûr İstefani dahi cevâbında senin gāib ani’l-meclis Lanberi v. Dimitri nâm zimmîye ber-mûceb-i i‘lâm-ı şer‘î mahkûmun-bih doksan guruş deynin olmağla mezbûr Yakomi yediyle bana irsâl ben dahi ba‘de’l-ahz dâinin merkūm Lanberi’ye verdim deyü def‘e tesâddî etmekle beynimizde nizâ‘-ı küllî cereyân etmişidi el-hâletü hâzihî bâ-vesâtet-i muslihîn da‘vâ-yı mezkûremden mesfûr İstefani zimmî ile on bir guruş bedel-i makbûza sulh olup meblağ-ı mezbûrun mâ‘adâsına müte‘allika âmme-i da‘vâdan mesfûrân İstefani ile Yakomi zimmînin zimmetlerini ibrâ-i âm ile ibrâ ve ıskāt eyledim deyü olan ikrârını mesfûr İstefani ve Yakomi dahi tasdîk eyledikleri mübâşirleri Mustafa Çavuş kulları ile huzûr-ı âlîlerine i‘lâm olundu. Fî 13 Ca sene 1163