Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 537 Hüküm no: 736 Orijinal metin no: [95a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’in, mehir bedeli ödemesi talebiyle daha önce muhâlaa yoluyla boşandığı kocası Kayıkçı Ali Beşe b. Mustafa’ya açtığı davada haksız bulunup davanın reddedildiği Ma‘rûz Zâtı ta‘rîf-i şer‘î ile mu‘arrefe olan sahibe-i arzuhâl Âişe bt. Mehmed nâm hatun meclis-i şer‘-i enverde derûn-ı arzuhâlde mezkûrü’l-ism zevc-i sâbıkı Kayıkcı Ali Beşe b. Mustafa nâm kimesne ile terâfu‘larında mezbûre Âişe Hatun zevc-i sâbıkı mezbûrun yedinde olan hüccet-i muhâla‘ada tafsîl ve beyân olunduğu üzere târih-i i‘lâmdan on dört buçuk ay mukaddem Davud Paşa Mahkemesi’nde hilâfeten müvellâ olan müderrisîn-i kirâmdan es-Seyyid İbrahim Hayâtî Efendi huzûrunda mezbûre Âişe Hatun otuz guruş mehir ve nafaka-i iddeti üzerlerine ve meûnet-i süknâsı dahi kendi üzerine olmak üzere zevci mezbûr Ali Beşe ile muhâla‘a-i sahîha-i şer‘iye ile hul‘ olup hukūk-ı zevciyete müte‘allika âmme-i da‘vâdan herbiri âharın zimmetini ibrâ ve ıskāt eylediğini ikrâr lâkin zevcim mezbûr beni görüp gözetmeyip kendiden hoşnûd ve râzı olmadığıma binâen ikrâhen hul‘ olmamla mehr-i mezkûr otuz guruşu zevcim mezbûr Ali Beşe’den taleb ederim deyü tesâddî eylediği da‘vâsında müdde‘iye-i mezbûrenin takrîr-i meşrûhu üzere kerh mu‘teber olmamağla zevci mezbûr Ali Beşe’ye suâl dahi teveccüh etmemeğin mûcebiyle müdde‘iye-i mezbûre Âişe Hatun mehr-i mezkûr mutâlebesiyle zevci mezbûr Ali Beşe’ye bî-vech-i şer‘î mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 20 Cumâdelûlâ sene 1163