Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 538 Hüküm no: 737 Orijinal metin no: [95a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Mehmed’in, mehir bedeli ve çıkardığı dişinin bedelinin ödenmesi talebiyle kocası Hacı Mehmed Efendi’ye açtığı davada sulh olduğu Ma‘rûz Kasaba-i Fındıklı’da Selime Hatun mahallesinde sâkin olup zâtı ta‘rîf-i şer‘î ile mu‘arrefe olan sahibe-i arzuhâl Hadîce bt. Mehmed nâm hatun meclis-i şer‘de derûn-ı arzuhâlde mezkûrü’l-ism zevc-i sâbıkı Mevcî el-Hâc Mehmed Efendi mahzarında mezbûr Mevcî Mehmed Efendi zevcim olup bundan akdem beni bâyinen tatlîk etmekle zimmetinde mütekarrer ve ma‘kūdün-aleyh otuz guruş mehr-i müeccelim hâlâ zimmetinde kaldığından mâ‘adâ târih-i i‘lâmdan dört gün mukaddem Balkapanı önünde bi-gayr-ı hakkın sille ile ağzıma darb ve darbından nâşî sağ üst çenemin önüne karîb bir dişimi ihrâc etmişidi hâlâ mehr-i mezkûrem ile zikrolunan bir dişimin mûceb-i şer‘îsini mezbûr el-Hâc Mevcî Mehmed Efendi’den taleb ederim deyü da‘vâya tesâddî eylediğimde beynimizde ba‘de vukū‘ı’l-münâza‘a bâ-vesâtet-i muslihîn [95b] da‘vâ-yı mezkûrelerimden beni mezbûr Mevcî Mehmed Efendi ile otuz guruş bedel-i makbûza sulh olup mehr-i mezkûreme ve dişime müte‘allika âmme-i da‘vâdan mezbûr Mevcî el-Hâc Mehmed Efendi’nin zimmetini ibrâ ve ıskāt eyledim deyü olan ikrârını mezbûr Mevcî el-Hâc Mehmed Efendi dahi tasdîk eylediği Mahkeme-i Bâb’dan huzûr-ı âlîlerine i‘lâm olundu. Fî 22 Cumâdelûlâ sene 1163