Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 538 Hüküm no: 738 Orijinal metin no: [95b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fransız tüccarlarından İzmir’de ikamet eden Gersun oğlu Versun’a borcu olan İzmirli Avadik v. Nazar’ın borcunu ödemesi Ma‘rûz France tüccârından medîne-i İzmir’de meks ve ikāmet üzere olan Gersun oğlu Versun v. Savel nâm müste’men tarafından meblağ-ı âti’z-zikri taleb ve da‘vâ ve ahz u kabza ve kendiye îsâle ve bunlar[ın] mütevakkıf olduğu umûrun küllîsine kabûlüne mevkūfe vekâlet ile vekîl olduğu Rafail v. Danyel ve Menahim v. Şemul nâm Yahûdiler şehâdetleriyle muvâcehe-i hasm-ı câhidde ber-vech-i şer‘î sâbit ve sübût-ı vekâletine hükm-i şer‘î lâhık olan yine France tüccârından Ancilo v. Timon nâm tercüman France tercümanlarından Tantan v. Taftan hazır olduğu hâlde Mehmed Çavuş kulları mübâşeretiyle Bâb Mahkemesi’nde meclis-i şer‘a ihzâr ettirdiği İzmirli Avadik v. Nazar nâm zimmî muvâcehesinde işbu yedimde olan bir kıt‘a deyn temessüğü mantûkunca târih-i i‘lâmdan on dört ay mukaddem mesfûr Avadik zimmî medîne-i mezbûrede müvekkilim merkūm Gersun oğlu Versun yedinden iştirâ ve kabz ve istihlâk eylediği levn ve zirâ‘ı beynlerinde ma‘lûm çuka semeni olan bin iki yüz yetmiş iki guruşdan dokuz yüz yirmi guruş mesfûr Avadik zimmetinde bâkī kalmağla meblağ-ı bâkī-i mezbûru mesfûr Avadik zimmîden bi’l-vekâle taleb ederim deyü ba‘de’d-da‘vâ ve’l-istintâk mesfûr Avadik cevâbında vekîl-i mezkûrun takrîr-i müdde‘âsı üzere târih-i mezkûrda müvekkil-i merkūm Gersunoğlu Versun yedinden iştirâ ve kabz ve istihlâk eylediği levn ve zirâ‘ı beynlerinde ma‘lûm çuka semeninden bâkī bi’l-vekâle müdde‘âsından el-yevm zimmetinde sekiz yüz elli guruş deyni olduğunu ikrâr ve i‘tirâf edip lâkin yetmiş beş guruş ziyâde müdde‘âsını dahi müvekkil-i merkūma edâ etmişidim deyü ol mikdârında ba‘de’d-def‘ ve’l-inkâr mesfûr Avadik def‘-i mezkûrunu beyâna ba‘de’l-havâle ikrârı mertebesi olan sekiz yüz elli guruş vekîl-i mezbûra edâ ve teslîme mesfûr Avadik zimmîye tenbîh olunduğu mübâşir-i mezbûr iltimâsıyla huzûr-ı âlîlerine i‘lâm olundu. Fî 23 Cumâdelûlâ sene 1163