Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 540 Hüküm no: 740 Orijinal metin no: [95b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Debre kasabasından Molla Ahmed b. Hüseyin’in, kardeşi Hasan’ı katledip ineğini aldıkları iddiasıyla Nikola v. İstiko ile Marko ve Niko’dan yalnızca Nikola’nın zimmetini ibra ettiği Ma‘rûz Vilâyet-i Rumeli’de Debre kasabası sâkinlerinden olup bundan akdem katîlen vefât eden Hasan b. Hüseyin’in li-ebeveyn er karındaşı ve hasran vârisi olan sahib-i arzuhâl Molla Ahmed bi’t-terâzî meclis-i şer‘de derûn-ı arzuhâlde mastûrü’l-ism Nikola v. İstiko nâm zimmî muvâcehesinde târih-i i‘lâmdan üç sene mukaddem karındaşım müteveffâ-yı mezbûr Hasan İstarve kazâsından Ohri kazâsına gider iken esnâ-i râhda Ohri Dağı’nda gece ile mesfûr Nikola refîkleri ve karındaşları gāibân ani’l-beled Marko ve Niko zimmîler ile yoluna inip tüfenk ile karındaşım mezbûr Hasan’ı bi-gayr-ı hakkın darb ve cerh ve katledip ve sekiz yüz guruş kıymetli ineğini dahi ahz etmeleriyle katl-i mezkûrun mûceb-i şer‘îsi ile zikrolunan ineği mesfûrûnun herbirinden taleb ve da‘vâ sadedinde olmuşidim el-hâletü hâzihî bâ-vesâtet-i muslihîn [96a] da‘vâ-yı mezkûremden ancak yalnız mesfûr Nikola zimmînin zimmetini ibrâ-i âmm-ı râfi‘u’l-hısâm-ı kātı‘u’n-nizâ‘la ibrâ ve ıskāt eylediğimde ol dahi ibrâ-i mezkûru kabûl eyledi deyü olan ikrârını mesfûr Nikola dahi tasdîk eylediği Mahkeme-i Bâb’dan mübâşirleri Muhtâr Çavuş kulları ile huzûr-ı âlîlerine i‘lâm olundu. Fî 23 min-Cumâdelûlâ sene 1163