Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 540 Hüküm no: 741 Orijinal metin no: [96a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Hüseyin’in alacak davasında sulh olduğu parayı Yusuf b. Receb’e ödemesi Ma‘rûz Sahib-i arzuhâl Yusuf b. Receb meclis-i şer‘de derûn-ı arzuhâlde mezkûrü’l-ism Hasan Çavuş b. Mehmed muvâcehesinde zâtı ta‘rîf-i şer‘î ile mu‘arrefe olan Âişe bt. Hüseyin hâzıra olduğu hâlde târih-i i‘lâmdan üç ay mukaddem İstanbul gümrüğü malından almak üzere yevmî on beş akçe vazîfeye mutasarrıfe olan Emine nâm hatunun mahlûlünden olmak üzere müteveffât-ı mezbûrenin sadrî sagīr evlâdları Seyyid İbrahim ve Şerife Âişe ve Şerife Zeyneb’den herbirine yevmî üçer akçeden cem‘an dokuz akçeyi işbu hâzıra-i mezbûre sıgār-ı merkūma tevcîh ettirdikden sonra mezbûr Hasan Çavuş zikrolunan dokuz akçenin tezkirelerini bana getirip ben dahi malımdan işbu mezbûr Hasan Çavuş’a mezbûre Âişe Hatun’a vermek için yetmiş beş guruş def‘ ve teslîm etmişidim lâkin zikrolunan dokuz akçe vazîfenin sahibe-i evveli olan Emine Hatun arzuhâl edip Gümrük emîni es-Seyyid İshak Ağa’nın i‘lâmı ile vazîfe-i mezkûre yine merkūme Emine’ye ibkā olunmağla medfû‘um olan meblağ-ı mezbûr yetmiş beş guruşu mezbûr Hasan Çavuş ile mezbûre Âişe’den taleb ve da‘vâ eylediğimde mezbûre Âişe dahi cevâbında târih-i mezkûrda meblağ-ı mezbûr yetmiş beş guruş mutâlebesinden zimmetimizi ibrâ ve ıskāt eyledik deyü def‘ sadedinde iken ba‘de vukū‘ı’l-münâza‘a bâ-vesâtet-i muslihîn da‘vâ-yı mezkûremden mezbûre Âişe Hatun ile elli beş guruş üzerine yine sulh olup mâ‘adâsı olan yirmi guruş da‘vâsından mezbûre Âişe ile mezbûr Hasan Çavuş’un zimmetlerini ibrâ ve ıskāt etmişidim hâlâ bedel-i sulh olan elli beş guruşu mezbûre Âişe’den taleb ederim deyü ba‘de’d-da‘vâ ve’s-suâl mezbûre Âişe dahi fi’l-hakīka hâl bi’l-cümle mezbûr Yusuf’un takrîri üzere olup bedel-i sulh olmak üzere zimmetinde müdde‘î-i mezbûra elli beş guruş deyni olduğunu ikrâr ve i‘tirâf etmeğin mûcebiyle meblağ-ı mezbûr elli beş guruşu müdde‘î-i mezbûr Yusuf’a edâ ve teslîme mezbûre Âişe’ye tenbîh olunduğu Mahkeme-i Bâb’dan huzûr-ı âlîlerine i‘lâm olundu. Fî 24 Cumâdelûlâ sene 1163