Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 541 Hüküm no: 742 Orijinal metin no: [96a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Oturakçı Hasan Ağa b. Abdullah’ın eşya alacağı olduğu iddiasıyla Çukadar Ali b. Ahmed’e açtığı davadan feragat ettiği Ma‘rûz Oturakçı tâifesinden arzuhâl sahibi Hasan Ağa b. Abdullah bi’t-terâzî meclis-i şer‘-i hatîrde derûn-ı arzuhâlde mastûrü’l-ism Çukadâr Ali b. Ahmed muvâcehesinde bundan akdem bi-kazâillâhi te‘âlâ vâki‘ olan harîkde Sipâh Çarşısı’ndaki dükkânımda hizmetkârım işbu hazır bi’l-meclis Süleyman dükkânım derûnunda olan eşyâ-i memlûkemden bir mikdâr eşyâmı tahlîs için mezbûr Çukadâr Ali’ye vermekle eşyâ-i mezkûremi mezbûr Çukadâr Ali’den taleb ederim deyü tesâddî eylediğim da‘vâmdan meccânen fâriğ olup husûs-ı mezkûreye müte‘allika âmme-i da‘vâdan mezbûr Çukadâr Ali’nin zimmetini ibrâ ve ıskāt eylediğimde ol dahi ibrâ-yı <> kabûl edip bu vechile kat‘-ı nizâ‘ eyledim deyü olan ikrârı Mahkeme-i Bâb’da ba‘de’t-tescîl mübâşirleri Kapıkethudâsı İsmail Beşe kulları ile huzûr-ı âlîlerine i‘lâm olundu bâkī emr ü fermân hazret-i veliyyü’l-emrindir. Fi’l-yevmi’r-râbi‘ ve’l-işrîn min-Cumâdelûlâ li-sene selâse ve sittîn ve mie ve elf min-hicreti men-lehu’l-izzü ve’ş-şeref