Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 542 Hüküm no: 744 Orijinal metin no: [96b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife bt. Abdullah’ın kocası Ali Beşe b. Musa’dan muhâlaa yoluyla boşandığı Ma‘rûz Derûn-ı arzuhâlde mezkûreti’l-ism Hanife bt. Abdullah b. Abdurrahman nâm hatun tarafından hul‘-ı âti’z-zikri ikrâra vekîl olduğu zâtı mu‘arrefeyi bi’l-ma‘rifeti’ş-şer‘iye ârifân İsmail Beşe b. Mehmed [ve] Süleyman Beşe b. Hüseyin nâm kimesneler şehâdetleriyle sâbit ve sübût-ı vekâletine hükm-i şer‘î lâhık olan Alemdâr Mehmed Beşe b. Yusuf nâm kimesne meclis-i şer‘-i hatîrde müvekkil-i merkūmenin zevc-i dâhili arzuhâl sahibi Ali Beşe b. Musa muvâcehesinde târih-i i‘lâm günü müvekkilem merkūme Hanife Hatun zevci mezbûrunun zimmetinde mütekarrer yirmi guruş mehri ve nafaka-i iddet-i ma‘lûmesi üzerlerine ve meûnet-i süknâsı dahi kendi üzerine olmak üzere zevc-i mezbûr Ali Beşe ile ber-vech-i şer‘î hul‘ oldukda ol dahi ber-vech-i muharrer hul‘-ı merkūmu ba‘de’l-kabûl hukūk-ı zevciyete müte‘allika âmme-i da‘vâdan herbiri âharın zimmetini ibrâ ve ıskāt eyleyip bu vechile kat‘-ı nizâ‘ eylediler deyü bi’l-vekâle olan ikrârını mezbûr Ali Beşe dahi tasdîk ettiği Mahkeme-i Bâb’dan huzûr-ı âlîlerine i‘lâm olundu emr ü fermân veliyyü’l-emr hazretlerinindir. Fî 25 Cumâdelûlâ sene 1163