Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 543 Hüküm no: 745 Orijinal metin no: [96b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lanberi’nin İsak ve Yoka v. Mosi kardeşlerle mutasarrıf oldukları sefineye ait alacak verecek davasında sulh olup birbirlerinin zimmetlerini ibra ettikleri Ma‘rûz İstanbul’da Balat İskelesi’nde merbût <> on altı zirâ‘ kapılı çekdirme ta‘bîr olunur sefînenin dört sehim i‘tibârıyla bir sehmine mutasarrıf olup sefîne-i mezkûrede sâbıkā reis olan sahib-i arzuhâl Lanberi nâm zimmî hasımları ve sefîne-i mezkûrenin üç sehmine mutasarrıflar olup derûn-ı arzuhâlde isimleri mastûr İsak ve Yako v. Mosi nâm karındaşlar ile meclis-i şer‘de ba‘de’t-terâfu‘i’ş-şer‘ beynlerinde hesâb ve kitâblarını rü’yet eylediklerinde mesfûr Lanberi zimmînin mezbûrân İsak ve Yako Yahûdilere mârrü’z-zikr sefîneden mesfûr Lanberi zimmînin tasarrufunda olan bir sehim hissenin semeni olan yüz guruşdan bâkī mesfûr Lanberi zimmetinde mezbûrân İsak ve Yako Yahûdilere seksen guruş deyni zuhûr ettikden sonra mesfûr Lanberi meblağ-ı bâkī-i mezbûr seksen guruşu hâlâ edâya iktidârı olmayıp tecîle tâlib oldukda mezbûrân İsak ve Yako’dan herbiri dahi meblağ-ı mezbûru târih-i i‘lâmdan yüz yirmi bir gün tamamında kendilere edâ ve teslîm etmek üzere mesfûr Lanberi zimmîyi tecîl eylediklerinde ol dahi ba‘de’l-kabûl ber-vech-i muharrer müeccelen edâya ta‘ahhüd eylediklerinden sonra mesfûr Lanberi zimmînin mezbûrândan müdde‘âsı olan otuz guruş navl-ı sefîne hissesinden mâ‘adâ târih-i i‘lâma gelince beynlerinde cereyân eden ahz u i‘tâya müte‘allika âmme-i da‘vâdan mesfûr Lanberi mezbûrânın zimmetlerini ibrâ ve ıskāt eylediğinde mezbûrân İsak ve Yako dahi rub‘-ı sefîne semeninden bâkī meblağ-ı mezkûr seksen guruşdan mâ‘adâ âmme-i da‘vâdan mesfûr Lanberi’nin zimmetini ibrâ ve ıskāt eyleyip ve herbiri âharın <> ibrâsını kabûl ile kat‘-ı nizâ‘ eyledikleri Mahkeme-i Bâb’da ba‘de’t-tescîl mübâşirleri olan es-Seyyid ( ) Çavuş kullarıyla huzûr-ı âlîlerine i‘lâm olundu <> Fî 26 Cumâdelûlâ sene 1163