Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 543 Hüküm no: 746 Orijinal metin no: [96b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdurrahman Efendi’nin, gemisini içindeki yüküyle birlikte batırdığı iddiasıyla Ahmed Reis b. Ali’ye açtığı davada sulh olduğu Ma‘rûz İstanbul’da Gül Câmi‘-i şerîfi kurbünde sâkin Abdurrahman Efendi meclis-i şer‘de rüesâ tâifesinden sahib-i arzuhâl Ahmed Reis b. Ali muvâcehesinde târih-i i‘lâmdan altı ay mukaddem sekiz yüz guruş kıymetli çek[le]ve ta‘bîr olunur on beş zirâ‘ sefînem derûnuna tahmîl olunan elli guruş kıymetli hatab ve kerestesiyle Bahr-i Siyah’da vâki‘ Kerpe Limanı’nda âriyet reisim olan Mehmed Reis lenger-endâz olup alâ-hâlihî yatır iken mezbûr Ahmed Reis râkib olduğu tonbaz ta‘bîr olunur sefînesiyle liman-ı mezkûra üç gün sonra girip zikrolunan sefînemin üzerine gelip sarf mümkün iken sarf etmeyip benim sefînemin kamanası üzerine uğradıp kesdirdiğinde sefînem başdan kara olup külliyyen helâk olmağla ba‘de’s-sübût kıymet-i mezkûresi olan sekiz yüz guruş ile hatab ve kereste semenleri olan elli guruş ki cem‘an sekiz yüz elli guruşu mezbûr Ahmed Reis’den taleb ve da‘vâ sadedinde iken bâ-tavassut-ı muslihîn da‘vâ-yı mezkûremden mezbûr Ahmed Reis ile beş zencirli altın bedel-i makbûza sulh olup sefîne-i mezkûreme ve âlâtına ve hamûlesine müte‘allika âmme-i da‘vâdan mezbûr [97a] Ahmed Reis’in zimmetini ibrâ-i âmm-ı râfi‘u’l-hısâm ile ibrâ ve ıskāt eylediğimde mezbûr Ahmed Reis dahi ibrâ-i mezkûru kabûl eyledi deyü olan ikrârını mezbûr Ahmed Reis dahi tasdîk eylediği Mahkeme-i Bâb’dan <> mübâşirleri Kapıkethudâsı Ali Beşe ve Halil Çavuş kulları ile huzûr-ı âlîlerine i‘lâm olundu. Fî 27 min-Ca sene 1163