Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 544 Hüküm no: 747 Orijinal metin no: [97a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Mehmed’in Ekmekçi Kasber v. Kohman ile alacak-verecek davasında sulh oldukları Ma‘rûz Sahib-i arzuhâl Hüseyin b. Mehmed meclis-i şer‘de derûn-ı arzuhâlde mezkûrü’l-ism ekmekçi tâifesinden Kasber v. Tohman zimmî muvâcehesinde târih-i i‘lâmdan üç ay mukaddem mesfûr Kasber beni bir husûs için tarafından vekâleten Diyârbekir’e göndermekle şuhûr-ı mezkûrede iktizâ eden ecr-i mislimi mesfûr Kasber’den taleb ve da‘vâ sadedinde olduğumda ol dahi bundan akdem sana on sekiz guruş yirmi dört paralık nân-ı azîz bey‘ ve teslîm eyledim deyü meblağ-ı mezbûr on sekiz guruş yirmi dört parayı benden taleb ve da‘vâ sadedinde olmağla beynimizde nizâ‘-ı küllî cereyân etmişidi el-hâletü hâzihî vesâtet-i muslihîn ile herbirimiz da‘vâ-yı mezkûrelerimizden fâriğler olup zikrolunan husûslara müte‘allika âmme-i da‘vâdan herbirimiz âharın zimmetini ibrâ-i âmm-ı râfi‘u’l-hısâm ile ibrâ ve ıskāt edip ve herbirimiz âharın ibrâsını kabûl ile kat‘-ı nizâ‘ eyledik deyü olan ikrârını mesfûr Kasber zimmî tasdîk eylediği Mahkeme-i Bâb’dan mübâşirleri Mehmed Çavuş kullarıyla huzûr-ı âlîlerine i‘lâm olundu. Fî 28 Ca sene 1163