Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 547 Hüküm no: 753 Orijinal metin no: [97b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâğıtçı esnafının, nizama aykırı olarak Frenk tüccarından kağıt satın alan ve ahval ve hareketlerinden şikayetçi oldukları Kâğıtcı Mehmed Çelebi ve Molla İsmail’in bir daha nizama aykıra hareket etmeme sözü vermeleriyle sulh oldukları Ma‘rûz Kâğıdcı esnâfının kethudâsı Ahmed Ağa b. Ebûbekir ve Kâğıdcıbaşı Mehmed Ağa b. Feyzullah ve Yiğitbaşı İsmail Çelebi ve esnâf-ı mezbûre ihtiyârlarından İmâm Hâfız Mustafa Efendi ve Hâfız Mehmed Efendi ve Devâtcılar kethudâsı Hacı Abdullah ve Mücellidler yiğitbaşısı Mustafa ve sâirleri Bâb Mahkemesi’nde yine kâğıdcı esnâfından Mehmed Çelebi b. Ahmed ve sulb-ı kebîr oğlu Molla Feyzullah muvâcehelerinde mezbûrân Mehmed Çelebi ve Molla Feyzullah esnâfımızdan olup kendi hâllerinde olmamağla hufyeten kendiler kethudâmız ve ihtiyârlarımızı ma‘rifetinsiz mahrûse-i Galata’dan Frenk tüccârından kâğıd iştirâ eylediklerinden mâ‘adâ dâimâ beynimizde verilen nizâm-ı kadîmimize mugāyir hareket ve herbirimize itâle-i lisân ve cevr ve ezâ etmeleriyle kendilere defe‘âtla nush u pend ve tenbîh eylediğimizde kat‘a ısgā etmeyip ve mütenebbiheler olmayıp kadîmî nizâmımıza halel vermeleriyle mezbûrândan bir vechile emn ü rahatımız yokdur deyü teşekkî eylediklerinde mezbûrân Mehmed Çelebi ve Molla Feyzullah fîmâ-ba‘d esnâf-ı mezbûrûnun kadîmî nizâmlarına mugāyir vaz‘ ve hareket etmemek üzere ta‘ahhüd eylediklerinde mezbûrûn dahi râzılar olup bu vechile kat‘-ı nizâ‘ eyledikleri tescîl ve mübâşir-i merkūm ile huzûr-ı âlîlerine i‘lâm olundu emr [ü] fermân veliyyü’l-emr hazretlerinindir. Fî 3 C sene 1163