Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 548 Hüküm no: 754 Orijinal metin no: [98a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap gediği sahiplerinin kefilsiz ve meçhul şahısları kendilerine ortak yapmamaları Ma‘rûz Sahib-i arzuhâl sığır kasablar kethudâsı Ali Ağa ve vekîli İsmail Çelebi sa‘âdetlü yeniçeri ağası bendeleri ma‘rifetiyle sığır kasabı ustalarından Hüseyin Bey ve el-Hâc Mehmed ve Ömer Bey ve diğer el-Hâc Mehmed ve İbrahim Bey ve el-Hâc Hasan ve Mehmed Beşe ve Ahmed Bey ve Süleyman Beşe ve Ahmed Beşe ve el-Hâc Abdullah ve Mehmed Bey ve es-Seyyid İbrahim ve es-Seyyid Salih ve es-Seyyid Hüseyin ve Süleyman Efendi ve Halil Ağa ve sâir Müslim ve kefere ve Yahûd bi’l-cümle kasab ustaları meclis-i şer‘de ez-kadîm nizâmımız İstanbul ve etrâfında vâki‘ kazâlarda olan sığır kasabı gediği ehl-i İslâm yedlerinde elli altı ve Yahûdiler yedlerinde on beş cem‘an yetmiş bir aded gedik i‘tibâr olunup cellâb tâifesinin Âsitâne-i sa‘âdet’e getirdikleri sığır kethudâ ve ustalar ma‘rifetleriyle ber-minvâl-i muharrer yetmiş bir gedik i‘tibârıyla tevzî‘ ve ashâbına teslîm ve semenleri yine ashâbından mutâlebe ve cem‘ ve cellâba edâ ve teslîm olunur eğer gedik sahibi olan kimesne mal-ı cellâbı itlâf edip edâya dahi kudreti olmaz ise kethudâ ve ustalar ma‘rifetleriyle gediği bedel-i ma‘lûm ile âhara verilip bedelinden deyni edâ olunup bu nizâm ez-kadîm bâ-fermân-ı âlî düstûrü’l-amel olup lâkin bir iki seneden berü gedik ashâbından bazıları mechûlü’l-ahvâl kimesneleri kendilere şerîk edip ve mutasarrıf olduğu gediğe müte‘allik olan ahz u i‘tâyı mezbûra ettirdip yedine teslîm olunan mal-ı cellâb telef oldukda mezbûr firâr yâhûd müflis olmağla mutâlebeden berî olup gedik sahibinden mutâlebe olunsa ben kat‘a nesne almadım ve ahz u i‘tâya müdâhale etmedim deyü cevâba tesâddî ve gediğinin âhara verilmesine mümâna‘at ve bu vechile nizâm-ı kadîm-i mezkûrumuzun ihtilâline ve cellâb tâifesinin dahi hasâret-i azîmeye giriftâr olmalarına bâdî olmağla cellâb tâifesini tatarruk-ı zarardan ve nizâm-ı kadîm-i mezkûru ihtilâlden hıfz ve savn için ba‘de’l-yevm mârrü’z-zikr gediklerin ashâbı umûrlarını kendileri rü’yet edip bi-hasebi’l-iktizâ bir kimesneyi şerîk etmek dahi lâzım olur ise ma‘lûmü’l-ahvâl ve zî-kudret kimesneyi ede yâhûd kethudâ ve ustalar ma‘rifetleriyle kavî kefîli alınıp ba‘dehû şerîk eyleye el-hâsıl kethudâ ve ustalar ma‘rifetleri ve kavî kefîli olmadıkca mechûlü’l-ahvâl kimesneler ber-minvâl-i muharrer kasablığa müdâhale etmemek üzere emr-i âlî sudûrunu istid‘â ve istirhâm ederiz dedikleri ma‘lûm-ı devletleri buyruldukda emr [ü] fermân hazret-i veliyyü’l-emrindir. Fî 4 Cemâziyelâhir sene 1163