Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 549 Hüküm no: 756 Orijinal metin no: [98b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gemi ile İstanbul’a gelen güller üstübücü esnafına ait olduğundan gülcü esnafının yaptıkları itirazlarının reddedildiği Bâ-mühr-i efendi Ma‘rûz Esvâkda gül bey‘ eden ashâb-ı arzuhâl Hasan ve İbrahim ve Abdülkerim ve es-Seyyid Mustafa ve Yusuf ve Mustafa meclis-i şer‘de derûn-ı arzuhâlde mezkûr üstübücü tâifesinin kethudâları Mehmed ve yiğitbaşıları Ahmed Beşe ve ustalarından Mehmed ve Ahmed ve Ali ve Süleyman ve Veli ve diğer Süleyman ve sâirleri muvâcehelerinde Karadeniz cânibinden Âsitâne-i <> aliyye’ye sefîne ile gelen gülü sefînelerden iştirâ murâd eylediğimizde mezbûrûn üstübücü tâifesi bize mümâna‘at edip kendileri iştirâ ederler suâl olunup ta‘arruzları men‘ ve def‘ olunmak murâdımızdır deyü da‘vâ eylediklerinde onlar dahi cevâblarında bizler Tersâne-i âmire’de Donanma-yı hümâyûn kalyonları ve sefâin-i sâire için hîn-i iktizâda kalafatlarına üstübü tedârik ve Tersâne-i âmire tarafından taleb olunduğu gibi vermek şartıyla üstübü iddihâr edegelip ziyâde üstübü tedârikine muhtâc olduğumuza binâen Karadeniz cânibinden sefîne ile gelen gülün iştirâsı bize mahsûs olup gülcü tâifesi bizden iştirâ ve mukābelesinde bize üstübü vermek üzere yedimizde emr-i âlîşân olmağla metâ‘ımız olduğuna binâen mezbûrûn gülcülerin sefâinden iştirâlarına mümâna‘at ederiz deyü mazmûn-ı münîfi min-külli’l-vücûh takrîr-i meşrûhlarına mutâbık bir kıt‘a emr-i âlîşân ibrâzıyla ba‘de’d-def‘ ve’l-istintâk müdde‘iyûn-ı mezbûrûn dahi mazmûn-ı emr-i âlîşânı mukır ve mu‘terif olmalarıyla ber-mûceb-i emr-i âlî sefâinden gül iştirâsı üstübücü esnâfına mahsûs olmağla müdde‘iyûn-ı mezbûrûn Gülcü Hasan ve İbrahim ve Abdülkerim ve es-Seyyid Mustafa ve Yusuf ve Mustafa’dan herbiri mezbûrûn üstübücülere bî-vech mu‘ârazaları men‘ olundukları <> huzûr-ı âlîlerine i‘lâm olundu. Fî 3 Cumâdelâhire sene 1163