Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 550 Hüküm no: 757 Orijinal metin no: [98b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kızıltaş mahallesinden Ümmügülsüm bt. Hacı Halil’e edepsizce iftirada bulunan Ahmed b. Ahmed ile hanımı Fâtıma’dan mahalle ahalisinin de şikayetçi olup mahallelerinden uzaklaştırılmalarını talep ettikleri Bâ-mühr-i efendi Ma‘rûz Mahmiye-i İstanbul’da Kızıltaş mahallesinde ve zâtı ta‘rîf-i şer‘î ile mu‘arrefe olan sahibe-i arzuhâl Ümmügülsüm bt. Hacı Halil nâm hatun meclis-i şer‘-i enverde yine mahalle-i mezbûre sâkinlerinden derûn-ı arzuhâlde mezkûrü’l-ism Ahmed b. Ahmed nâm kimesne mahzarında mezbûr Ahmed târih-i i‘lâmdan üç gün mukaddem bana kerhâneci ve fâhişe deyü bi’l-muvâcehe şetm eylediğinden mâ‘adâ mahalle-i mezbûrede dükkân be-dükkân gezip benim için menziline kalyoncular ve mechûlü’l-ahvâl kimesneler girip çıkar deyü hetk-i ırz etmekle mûcebini mezbûr Ahmed’den taleb ederim deyü ba‘de’d-da‘vâ ve’l-inkâr müdde‘iye-i mezbûre ber-vech-i muharrer müdde‘âsını udûlden ve mahalle-i mezbûre sükkânından el-Hâc Mehmed Ağa b. Mehmed ve el-Hâc Ahmed Ağa b. Mustafa şehâdetleriyle mezbûr Ahmed muvâcehesinde vech-i şer‘î üzere isbât etmeğin mûcebince mezbûr Ahmed’e şer‘an ta‘zîr lâzım geldiği ba‘de’t-tescîl mahalle-i mezbûre imâmı Abdullah Efendi ve ahâlîsinden el-Hâc Mehmed Ağa ve Hacı Ahmed Ağa ve el-Hâc Ali ve Süleyman Çelebi ve Çukadâr Mustafa Beşe ve Molla Hüseyin ve Ali Beşe ve sâirleri mezbûre Ümmügülsüm Hatun mahallemizde sâkine ve ırzıyla mukayyede olup bu âna gelince kat‘a kendiden hilâf-ı şer‘-i şerîf vaz‘ ve hareket sudûr etmemişdir ve hakkında mezbûrun kelâmı ifk ü iftirâdır her vechile kendiden hoşnûd ve râzalar ve kefîlleriz deyü mezbûre Ümmügülsüm’ün hüsn-i hâlini ve mezbûr Ahmed mahallemize geleli üç aydan beri kendinin ve zevcesi Fâtıma’nın itâle-i lisânlarından cümlemiz mesâvî ve mutazarrır olmağla bi’d-defa‘ât kendiye tenbîh eylediğimizde bir vechile mütenebbih olmamağla mezbûrun ve zevcesinin evzâ‘ ve etvârından hoşnûd ve râzı değilleriz deyü mezbûr Ahmed’in muvâcehesinde sû’-i hâlini ihbâr ve mahalle-i mezbûreden ihrâcıyla tedîb olunmasi’çün fermân-ı âlî ricâsında oldukları Mahkeme-i Bâb’dan huzûr-ı âlîlerine i‘lâm olundu. Fî 5 C sene 1163