Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 80 Hüküm no: 78 Orijinal metin no: [16a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ligori’nin sahibi olduğu fırın gediğini Yani’ye satıp fırını kendisine kiraladığı Medîne-i Üsküdar’a muzâfe Büyükada demekle ma‘rûf adada mütemekkin Ligori v. Yani nâm zimmî meclis-i şer‘-i şerîf-i enverde mahrûse-i Galata’da kâin francalacı tâifesinden işbu hâmilü’r-rakīm Yani v. Papa Mihal nâm zimmî muvâcehesinde ikrâr ve takrîr-i kelâm edüp ada-i mezkûrda vâki‘ târîh-i kitâbdan sekiz sene mukaddem kendü mülküm olmak üzere müceddeden bir fırın binâ edüp ve fırın-ı mezkûrda gâh francala ve gâh nân-ı azîz tabh olunagelüp lâkin fırın-ı mezkûrun derûnunda mevcûd gedik ta‘bîr olunur on ...? ve üç kürek ve bir kazgan ve on tahta ve yedi kuta ve bir tekne ve iki sepet ve sâir âlât-ı lâzımesini tarafeynden îcâb ve kabûlü hâvî ve şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile yüz guruşa merkūm Yani’ye bey‘ u teslîm ve temlîk eylediğimde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezkûr yüz guruşu tamâmen bana def‘ u teslîm ben dahi yedinden ahz ü kabz eyleyüp bey‘-i mezkûrun tağrîr ve gabnine müte‘allıka âmme-i da‘vâdan her birimiz âharın zimmetini ibrâ ve iskāt eyledik fîmâ-ba‘d gedik ta‘bîr olunur âlât-ı lâzıme-i mezkûre merkūm Yani’nin mülk-i müşterâsı ve hakk-ı sırfı olup benim alâka ve medhalim kalmayup zikr olunan fırını ve üzerinde kâin dört bâb odasıyla ma‘an târîh-i kitâb gurresinden beher sene ellişer guruşa merkūm Yani’ye icâr ve teslîm eylediğimde ol dahi ber-vech-i muharrer isticâr ve kabûl etmeğin mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Muharremü’l-haram li-seneti semânîn ve mi’ete ve elf. Şuhûdü’l-hâl: Abdurrahman b. Emrullah, Osman b. Hasan, Baba Hasan b. Abdullah, el-Hâc Ömer b. Mehmed, Ali Çelebi b. Ahmed ve gayruhum.