Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 553 Hüküm no: 762 Orijinal metin no: [99b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gürcü Osman b. Abdullah’ın, vefat eden kardeşi Süleyman’ın Gürcü Hacı Mustafa’daki alacağının tahsili için açtığı davada sulh olup birbirlerinin zimmetlerini ibra ettikleri Ma‘rûz Derûn-ı arzuhâlde mezkûr müteveffâ Gürcü Süleyman b. Abdullah’ın mukarrun-leh bi’n-neseb cihetinden li-ebeveyn er karındaşı ve hasran vârisi olduğu ber-mantûk-ı hüccet-i şer‘iye zâhir ve mütehakkık olan sahib-i arzuhâl Gürcü Osman meclis-i şer‘-i hatîrde fincancı tâifesinden olup arzuhâlde mastûrü’l-ism Gürcü el-Hâc Mustafa muvâcehesinde mezbûr Osman cânib-i şer‘-i enverden yedlerine i‘tâ olunan hüccet-i musâlahada tahrîr ve tafsîl ve beyân olunduğu vech üzere karındaşı müteveffâ-yı mezbûrdan mevrûs olmak üzere bâ-temessük merkūm el-Hâc Mustafa’dan cihet-i karzdan tesâddî eylediği altı yüz guruş da‘vâsından bâ-tavassut-ı muslihîn mezbûr el-Hâc Mustafa ile an-inkâr kırk guruş bedel-i makbûza sulh olup mâ‘adâ beş yüz altmış guruşa müte‘allika âmme-i da‘vâdan mezbûr el-Hâc Mustafa’nın zimmetini ibrâ ve ıskāt eyledikde ol dahi bedel-i sulh olan meblağ-ı medfû‘-ı mezbûr kırk guruşa müte‘allika âmme-i da‘vâdan mezbûr Osman’ın zimmetini ibrâ ve ıskāt edip herbiri âharın ibrâsını kabûl ile kat‘-ı nizâ‘ eyledikleri Mahkeme-i Bâb’dan huzûr-ı âlîlerine i‘lâm olundu. Fî 8 C sene 1163