Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 554 Hüküm no: 763 Orijinal metin no: [99b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ispartalı Musa b. Musa’nın, alacak iddiasıyla Kaşıkçıoğlu Mehmed b. Hasan’a açtığı davada Mehmed’in daha önce sulh olduklarını ispat etmesi üzerine davanın reddedildiği [Ma‘rûz] İstanbul’da Hekîm Çelebi Medresesi’nde sâkin Ispartalı sahib-i arzuhâl Musa b. Musa meclis-i şer‘de derûn-ı arzuhâlde mezkûrü’l-ism Kaşıkçıoğlu Mehmed b. Hasan nâm kimesne muvâcehesinde mezbûr Mehmed elli yedi senesi Ramazan’ının on beşinci günü Isparta’dan Kartaz’a ticâret tarîkıyla giderken Çimenova nâm mahâlde önüme inip kırk yedi guruş nakid akçem ile üç guruş kıymetli bir bıçağım ve bir katırımı ve sâir eşyâmı gasben alıp hatta katırımı bir âdemle göndermiş ol âdeme on guruş verip katırı aldım şimdi Kebeciler Hanı’nda üç gün mukaddem on yedi guruşunu dahi verdi mâ‘adâ otuz guruş ile sâir eşyâmı dahi mezbûrdan hâlâ taleb ederim deyü mezbûr Mehmed husûs-ı mezkûru külliyyen inkârından mâ‘adâ mezbûr Musa üç gün mukaddem Kebeciler Hanı’nda odama gelip husûs-ı mezkûru yine benden da‘vâya tesâddî eylediğinde bâ-vesâtet-i muslihîn an-inkâr beni mezkûr Musa ile on yedi guruş üzerine sulh eylediklerinde ol dahi sulh-ı mezkûru kabû[l] ve bedel-i sulh olan meblağ-ı mezkûr on yedi guruşu yedimden tamamen ahz u kabz edip mâ‘adâ otuz guruşa ve eşyâ-i sâiresine müte‘allika âmme-i da‘vâdan benim zimmetimi ibrâ ve ıskāt etmişidi deyü ba‘de’d-def‘ mezbûr Musa on yedi guruş ahzını yine ikrâr mâ‘adâdan ibrâyı inkâr etmeğin mezbûr Mehmed ber-vech-i muharrer def‘-i mezkûrunu lede’t-tezkiye adâletleri zâhir olan Kebeciler Hanı sükkânından Ebûbekir Çelebi b. Ahmed ve es-Seyyid Ali Çelebi b. Mustafa ve Ali Çelebi b. İbrahim nâm kimesne şehâdetleriyle mezbûr Musa muvâcehesinde vech-i şer‘î üzere isbât etmeğin mûcebiyle müdde‘î-i mezkûr Musa mezbûr Kaşıkçıoğlu Mehmed’e bî-vech-i şer‘î mu‘ârazadan men‘ olunduğu mübâşirleri Ahmed Çavuş kulları iltimâsıyla Mahkeme-i Bâb’dan huzûr-ı âlîlerine i‘lâm olundu. Fî 11 C sene 1163