Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 554 Hüküm no: 764 Orijinal metin no: [99b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahalinin mallarını gasp eden başıboş ve yaramaz kimselerden görevliler tarafından mahalle, han ve konaklarda yapılan teftiş neticesinde altmış sekiz kişinin yakalanıp cezalarının verilmek üzere ilgili kolluk kuvvetlerine teslim edildikleri Bâ-mühr-i hazret-i efendi Ma‘rûz Dirlikde ve sanâyi‘de alâka ve medhali olmayıp bî-kisb ve bî-kâr bazı erâzil ve eşhâs mücerred ibâdullâhın emvâl ve eşyâsını yağma ve gāret fikr-i fâsidiyle bazı mahallere kundak bırakmak misillü mel‘anet ve habâsete cür’et ve ızrâr-ı ibâda cesâret eyledikleri cihetden ol makūle erâzil ve esâfil İstanbul ve müzâfâtı olan mahallâtda ve han ve koltuk hanına müşâbih konaklarda alâ-vechi’t-taharrî teftîş ve tefahhus olunmak bâbında şeref-bahş-ı sudûr olan fermân-ı âlîlerine imtisâlen cânib-i şer‘-i enverden irsâl olunan kâtib dâ‘îleri ve taraf-ı Devlet-i aliyye’den mübâşir ta‘yîn buyrulan hazret-i sadr-ı âlî ağalarından Ayasofyalı el-Hâc Hasan Ağa ve Karakulak Hasan Ağa ve es-Seyyid Yahya Ağa kulları ve izzetlü yeniçeri ağası taraflarından ta‘yîn olunan yazıcılarından Ağazâde Ahmed Efendi ve Mu‘bir Hasan Efendi ve es-Seyyid Mustafa Efendi ve rif‘atlü cebecibaşı ağa tarafından ta‘yîn olunan üç nefer kullukcuları kulları ile İstanbul ve müzâfâtı olunan [olan] cümle mahallât ve han ve koltuk hanına müşâbih konakları mahallât imâmları ma‘rifetiyle alâ-vechi’l-ihtimâm dikkat ve taharrî birle teftîş ve tefahhus eylediklerinde bâlâda tahrîr olunduğu vech üzere İstanbul ve müzâfâtı olan mahallâtda ve han ve koltuk hanına müşâbih [100a] konaklarda bulunup haber verdikleri altmış sekiz nefer erâzil ve esâfilleri isim ve resm ve vilâyetleriyle tahrîr ve haklarında iktizâ eden cezâ ve tedîbleri icrâ olunmak için huzûr-ı âlîlerine irsâl ve ihzâr buyurulmağiçün mübâşirûn-ı merkūmûn kulları yediyle ağayân-ı mûmâ-ileyhimâ taraflarına irsâl eylediklerini kâtib dâ‘îleri mahâllinde ketb ü tahrîr ve bi-ecmâ‘ihim meclis-i şer‘a gelip alâ-vukū‘ihî inhâ eyledikleri huzûr-ı âlîlerine i‘lâm olundu ma‘lûm-ı devlet-i âsafâneleri buyruldukda emr [ü] fermân hazret-i veliyyü’l-emrindir. Fî 11 min-Cumâdelâhire sene 1163