Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 555 Hüküm no: 765 Orijinal metin no: [100a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küretülhadid kazasının Çöplüce köyünden Seyyid Süleyman b. Seyyid Mustafa’nın Sart kazasının Saltıklı köyünden nikahlısı Fâtıma’ya olan mehr-i muaccelini verip Fatma’nın da kocasına itaat etmek üzere birbirleriyle anlaştıkları Ma‘rûz Anadolu’da Kastamonu sancağında Küretü’l-hadîd kazâsına tâbi‘ Çöplüce nâm karye ahâlîsinden sahib-i arzuhâl es-Seyyid Süleyman b. es-Seyyid Mustafa meclis-i şer‘de kazâ-i mezkûr kurbünde Sart? kazâsına tâbi‘ Saltıklı nâm karye ahâlîsinden derûn-ı arzuhâlde mezkûrü’l-ism Molla Mustafa b. Ahmed muvâcehesinde mezbûr Molla Mustafa’nın sulbiye kebîre kızı olup zâtı Mehmed b. Mustafa ve Osman b. Mehmed ta‘rîfleriyle mu‘arrefe olan Fâtıma nâm bikr-i bâliğa hâzıra olduğu hâlde târih-i i‘lâmdan beş sene mukaddem karye-i mezbûrede mezbûre Fâtıma tarafından babası mezbûr Molla Mustafa vekâleten benim tarafımdan karındaşım işbu es-Seyyid Ali vekîl olup sekiz bin akçe mehr-i müeccel tesmiye edip ve bir sîm kuşak ve bir çift sîm küpe ve çuka ferâce ve bir kaftan ve bir entâri ve bir şalvar ve bir çuka cebe ve bir baş yemenîsi dahi mu‘accel olmak üzere mahzar-ı şühûdda müvekkile-i mezbûre Fâtıma’nın nefsini mezbûr Molla Mustafa bi’l-vekâle bana akd-i tezvîc benim vekîlim ve karındaşım mezbûr dahi benim için bi’l-vekâle tezevvüc ve kabûl etmeğin mezbûre Fâtıma ber-vech-i muharrer zevce-i menkûham olmağla mezbûrâna suâl olunup mu‘accel tesmiye olunan eşyâ-i muharrer-i mezkûreyi mezbûre Fâtıma’ya def‘ ve teslîmle mezbûre Fâtıma’nın nefsini bana teslîme mezbûrâna tenbîh olunması matlûbumdur deyü ba‘de’d-da‘vâ ve’s-suâl mezbûrân Molla Mustafa ile kızı Fâtıma’dan herbiri kazıyye minvâl-i meşrûh üzere olup zevce-i menkûhası olduğunu herbiri ikrâr ve i‘tirâf etmeleriyle mûcebiyle eşyâ-i mu‘accele-i mezkûreyi mezbûre Fâtıma’ya def‘ ve teslîme mezbûr es-Seyyid Süleyman’a ve ba‘dehû mezbûre Fâtıma dahi nefsini mezbûr es-Seyyid Süleyman’a teslîme tenbîh olunduğu Mahkeme-i Bâb’dan huzûr-ı âlîlerine i‘lâm olundu. Fî 12 min-Cumâdelâhire sene 1163