Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 56 Hüküm no: 2 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Andon’un Kasap Toma’ya olan borcunu ödemesi 151 guruşa hükm Ma‘rûz Kasab Toma v. Yani nâm zimmî İstanbul Bâb Mahkemesi’nde meclis-i şer‘de Andon v. Kiryako nâm zimmî muvâcehesinde mersûm Andon zimmî zimmetinde işbu târîh-i i‘lâmdan bir buçuk sene mukaddem mâlımdan ve yedimden iştirâ ve kabz eylediği beher vakıyyesi yüzer paraya olarak altmış yedi vakıyye lahm-ı ganem semeninden cem‘an yüz altmış yedi buçuk guruş alacak hakkım olup hattâ târîh-i i‘lâmdan bir gün mukaddem İstanbul’da Fener kapısı hâricinde berber dükkânında zimmî-i mersûm ile hesâbımızı rü’yet eylediğimizde mesfûr Andon zimmî meblağ-ı mezkûr yüz altmış yedi buçuk guruş zimmetinde bana deyni olduğunu ikrâr ve meblağ-ı mezkûrun on altı buçuk guruşunu teslîm edip bâkīsi olan yüz elli bir guruşu mersûm Andon zimmîden hâlâ taleb ederim deyü ba‘de’d-da‘vâ ve’l-inkâr müdde‘î-i mersûm ber-vech-i muharrer müdde‘âsını her biri mahallerinde lede’t-tezkiye adl ve makbûlü’ş-şehâde idikleri ihbâr olunan Kahveci es-Seyyid Osman b. Mehmed Sadık nâm kimesne ile Kosti v. Vasil nâm zimmî şehâdetleriyle isbât etmeğin mûcebince meblağ-ı bâkī-i mezkûr yüz elli bir guruşu müdde‘î-i mersûm Toma zimmîye edâ ve teslîme mersûm Andon zimmîye tenbîh olunduğu mübâşirleri Bâb-ı Seraskerî kavaslarından Tophâneli Abdullah Kavas kulları yediyle huzûr[-ı âlîlerine i‘lâm olundu] Fî 3 Receb sene [12]55