Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 56 Hüküm no: 3 Orijinal metin no: [1b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Donik’in Bağdisar’a kefaletinden doğan borcunu ödemesi 360 guruşa hükm Ma‘rûz Arzuhâl eden Bağdisar v. Ohannes nâm zimmî İstanbul Bâb Mahkemesi’nde meclis-i şer‘-i münîrde derûn-ı arzuhâlde mastûrü’l-ism Donik v. Bedros nâm zimmî muvâcehesinde benim mersûmun babası gāib ani’l-meclis mesfûr Bedros zimmî zimmetinde cihet-i karzdan alacak hakkım olan üç yüz altmış guruşa işbu oğlu mersûm Donik zimmî bundan akdem tarafeynden bi’l-emr ve’l-kabûl kefâlet-i sahîha-i şer‘iye ile kefîl ve dâmin olmağla meblağ-ı mezbûr üç yüz altmış guruşu mersûm Donik zimmîden kefâlet-i mahkiyesine binâen hâlâ taleb ederim deyü da‘vâ ettikde ol dahi cevâbında kaziyye minvâl-i muharrer üzere olduğunu ikrâr ü i‘tirâf etmeğin mûcebince meblağ-ı mezbûr üç yüz altmış guruşun müdde‘î-i mersûm Bağdisar zimmîye bi-hükmi’l-kefâle edâsıyla mersûm Donik zimmî ilzâm olunduğu huzûr[-ı âlîlerine i‘lâm olundu] Fî 2 Receb sene [12]55