Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 57 Hüküm no: 5 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ağya’nın Kuyumcu Artin’e olan borcunu ödemesi 200 guruşa sulh Ma‘rûz Kuyumcu Artin v. Marka nâm zimmî İstanbul Bâb Mahkemesi’nde meclis-i şer‘-i hatîrde Saatçi Ağya v. Lotagi nâm zimmî muvâcehesinde mersûmun zimmetinde bundan akdem mâlımdan ve yedimden iştirâ ve kabz eylediği bir aded pesendîde sâ‘at semeninden beş yüz yirmi guruş alacak hakkım olmağla meblağ-ı mezbûru zimmî-i mersûmdan hâlâ taleb ederim deyü tasaddî eylediğim da‘vâmdan bâ-tavassut-ı muslihîn zimmî-i mersûm ile kat‘an-li’n-nizâ‘ bi’t-tav‘ ve’r-rızâ iki yüz guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr iki yüz guruşu müdde‘î-i mersûm Artin zimmîye edâ ve teslîmiyle mersûm Ağya zimmî ilzâm olunduğu tescîl ve ve mübâşirleri Bâb-ı Seraskerî kavaslarından Hasan Kavas yediyle huzûr[-ı âlîlerine i‘lâm olundu] Fî 8 Receb sene [12]55