Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 58 Hüküm no: 8 Orijinal metin no: [2a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yaşı küçük olan Fâtıma’nın bakılması için büyükannesinin yanına verilmesi Sagīreyi min-kıbeli’l-üm ceddesine teslîme tenbîh Ma‘rûz Sâhibe-i arzuhâl mu‘arrefetü’z-zât Fâtıma bt. İsmail nâm hatun İstanbul Bâb Mahkemesi’nde meclis-i şer‘de derûn-ı arzuhâlde mezkûrü’l-ism kezâlik zâtı mu‘arrefe diğer Fâtıma bt. Abdullah nâm hatun muvâcehesinde dâmadım es-Seyyid Mustafa b. Osman ile sadriye kebîre kızım kezâlik işbu hâzıratü bi’l-meclis Rukiye bt. Ali’nin mukaddemâ zevciyyet beynlerinde kāime iken mezbûrun firâşından hâsıla ve kızım hâzıra-i mezbûreden mütevellide sulbiye kızı Fâtıma nâm sagīre vâlidesi mezbûrenin bi-hakkı’l-hıdâne hacr ü terbiyesinde iken kızım hâzıra-i mezbûre nefsini sagīre-i merkūma ecnebî olan kimesneye mütezevvice ve hakk-ı hıdâne kendiden sâkıt olup ben dahi ecnebiyeye mütezevvice olmamla ol vechile merkūme diğer Fâtıma Hatun min-kıbeli’l-eb ceddesi olduğuna binâen sagīre-i merkūmeyi ahzetmişidi el-hâletü hâzihi ben bu def‘a zevcimden müfârakat etmemle binâen-aleyh sagīre-i merkūmeyi bana teslîme ceddesi merkūme diğer Fâtıma Hatun’a tenbîh olunmak matlûbumdur deyü da‘vâ ettikde ol dahi cevâbında kaziyye minvâl-i meşrûh üzere olduğunu ikrâr ü i‘tirâf etmeğin mûcebince sagīre-i mezbûre min-kıbeli’l-üm ceddesi müdde‘iyye-i mezbûre Fâtıma Hatun’a teslîme mezbûre diğer Fâtıma Hatun’a tenbîh olunduğu huzûr[-ı âlîlerine i‘lâm olundu] Fî 3 Receb sene [12]55