Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 59 Hüküm no: 10 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Reşid Ağa’nın Yahudi Şimon’daki alacağını tecil ettiği 600 [625] guruş te’cîl Ma‘rûz Mehmed Reşid Ağa b. Osman nâm kimesne İstanbul Bâb Mahkemesi’nde meclis-i şer‘de Şimon v. Mişon nâm Yahûdi muvâcehesinde benim mersûm Şimon Yahûdi zimmetinde cihet-i havâleden bâ-i‘lâm-ı şer‘î mahkûmün-bih altı yüz yirmi beş guruş alacak hakkım olup lâkin meblağ-ı mezkûr altı yüz yirmi beş guruşu mersûm Şimon Yahûdi’nin hâlen ve def‘aten bana edâya iktidârı olmayıp ber-vech-i âtî te’cîle tâlib olduğunda ben dahi târîh-i i‘lâmdan beher üç ay mürûrunda ellişer guruş verip mecmû‘unu otuz altı ay kırk beş guruş tamâmına değin tamâmen bana edâ ve îfâ etmek üzere rızâmla medyûnum mersûm Şimon Yahûdi’yi te’cîl ve taksît eyledim deyü mukırr-ı merkūm Mehmed Reşid Ağa’nın bi’l-cümle takrîr-i meşrûhunu mersûm Şimon Yahûdi tasdîk ve meblağ-ı mahkûmün-bih-i mezkûr altı yüz yirmi beş guruşu ber-vech-i muharrer müeccelen ve mukassaten dâyini müdde‘î-i merkūma edâya müte‘ahhid olduğu tescîl ve mübâşirleri Bâb-ı Seraskerî kavaslarından Üsküdarlı Ahmed Kavas kulları yediyle huzûr[-ı âlîlerine i‘lâm olundu] Fî 4 Receb sene [12]55