Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 60 Hüküm no: 11 Orijinal metin no: [2b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostandi’nin ev sahibi Abdülhamid Ağa’ya olan borcunu ödemesi 360 guruşa hüküm Ma‘rûz Örücü esnâfından sâhib-i arzuhâl es-Seyyid Abdülhamid Ağa b. el-Hâc Mustafa nâm kimesne İstanbul Bâb Mahkemesi’nde meclis-i şer‘de derûn-ı arzuhâlde mastûrü’l-ism Kostandi v. Kirkor nâm zimmî muvâcehesinde İstanbul’da Yedikule kurbünde Hacıevhad mahallesinde vâki‘ mutasarrıf olduğum bir bâb vakıf menzilimi bin iki yüz elli dört senesi Recebi’l-ferdi gurresinden beher şehr otuzar guruş icâre tesmiyesiyle mesfûr Kostandi zimmîye îcâr ve teslîm eylediğimde ol dahi istîcâr ve kabûl etmişidim [etmişidi] el-hâletü hâzihî işbu sene-i mübâreke Cumâdelâhiresi gāyetinde fesh-i akd-i icâre etmemizle müddet-i mezkûrede icâre-i mezkûreden mersûmun zimmetinde müctemi‘ alacak hakkım olan üç yüz altmış guruşu zimmî-i mersûmdan hâlâ taleb ederim deyü da‘vâ ettikde ol dahi cevâbında ber-vech-i muharrer ikrâr lâkin deynim olan meblağ-ı mecmû‘-ı mezkûrun üç yüz guruşunu mukaddemâ ceste ceste zevcem işbu hâzıratü bi’l-meclis Anastasya bt. Todori nâm Nasrâniye yediyle müdde‘î-i merkūma edâ ve teslîm edip ancak bâkī zimmetinde altmış guruş deynim kalmıştır deyü müdde‘î-i merkūmun inkârına mukârın eylediği def‘ine ikāmet-i beyyine edemeyip bi’t-taleb merkūm es-Seyyid [Abdü]lhamid Ağa bi’l-muvâcehe vech-i şer‘î üzere tahlîf olunmağın mûcebince dâfi‘-i mersûm Kostandi zimmî def‘-i mezkûresiyle merkūm es-Seyyid Abdülhamid Ağa’ya bilâ-beyyine mu‘ârazadan ba‘de’l-men‘ mersûm Kostandi zimmînin sâlifü’z-zikr ikrârıyla lâzım gelen meblağ-ı mezkûr üç yüz altmış guruşu müdde‘î-i merkūm es-Seyyid Abdülhamid Ağa’ya edâya mersûm Kostandi zimmîye tenbîh olunduğu huzûr[-ı âlîlerine i‘lâm olundu] Fî 6 Receb sene [12]55