Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 61 Hüküm no: 12 Orijinal metin no: [2b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Ağa’nın Halil Ağa b. İbrahim’e olan borcunu ödediği 450 guruşa men‘ Ma‘rûz Bâ‘isü’l-i‘lâm Halil Ağa b. İbrahim nâm kimesne İstanbul Bâb Mahkemesi’nde meclis-i şer‘de el-Hâc Halil Ağa b. el-Hâc İbrahim nâm kimesne muvâcehesinde işbu târîh-i i‘lâmdan bir sene mukaddem mezbûr el-Hâc Halil Ağa’nın yedine li-ecli’l-hıfz mâlımdan dört yüz elli guruş îdâ‘ ve teslîm eylediğimde ol dahi ber-minvâl-i muharrer yedimden istîd‘â ve kabz etmişidi el-hâletü hâzihî meblağ-ı mezkûru mezbûr el-Hâc Halil Ağa’dan hâlâ taleb ederim deyü da‘vâ ettikde ol dahi cevâbında müdde‘î-i merkūm Halil Ağa’nın ber-vech-i muharrer müdde‘âsını ikrâr lâkin ben meblağ-ı mezkûr dört yüz elli guruşu bundan akdem kendiye tamâmen edâ ve teslîm etmişidim deyü eylediği def‘inde mezbûr el-Hâc Halil Ağa yemîniyle tasdîk olunur ümenâdan olmağla üzerine redd-i damân lâzım gelmediğine bi’t-taleb mezbûr el-Hâc Halil Ağa bi’l-muvâcehe vech-i şer‘î üzere tahlîf olunmağın mûcebince merkūm Halil Ağa da‘vâ-yı mezkûresiyle merkūm el-Hâc Halil Ağa’ya bî-vech-i şer‘î mu‘ârazadan men‘ olunduğu bi’l-iltimâs huzûr[-ı âlîlerine i‘lâm olundu] Fî 9 Receb sene [12]55