Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 62 Hüküm no: 14 Orijinal metin no: [2b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Satıldıktan sonra ayıplı olduğu anlaşılan atın iadesi Redd-i mebî‘-i bârgir Ma‘rûz-ı dâ‘î Midillici tâifesinden Ahmed b. İbrahim İstanbul Bâb Mahkemesi’nde meclis-i şer‘-i münîrde tâife-i merkūmeden Ali b. Mustafa nâm kimesne muvâcehesinde târîh-i i‘lâmdan yirmi dört gün mukaddem cemî‘ uyûbdan sâlime olmak üzere merkūm Ali’nin mâlından ve yedinden beş yüz yetmiş guruş semen-i medfû‘ ve makbûza iştirâ ve kabz eylediğim işbu meclis-i şer‘de mu‘âyene olunan bir re’s kır esbin sol ayağı budunda saraca illeti olup ol vechile mu‘ayyeb ve ayb-ı mezkûr şirâ târîhinden kadîm ve inde’t-tüccâr noksân-ı semen îcâb eder uyûbdan olmağla redd-i mebî‘ ve istirdâd-ı semen olunmak matlûbumdur deyü teveccüh-i husûmet bulundukdan sonra da‘vâ ettikde ol dahi cevâbında esb-i mezkûru târîh-i mezkûrda müdde‘î-i merkūma cemî‘ uyûbdan sâlime olmak üzere beş yüz yetmiş guruş semen-i makbûza bey‘ini ikrâr, ayb-ı mezkûrun kıdemini inkâr etmekle müdde‘î-i merkūm zikr olunan ayıp esb-i mezkûrda şirâ târîhinden kadîm olduğunu bu makūle uyûbu teşhîse vukūf-ı tammı olan bî-kâr tâifesinden Ali b. Mustafa ve Mustafa b. Süleyman nâm kimesne[ler] şehâdetleriyle bi’l-muvâcehe vech-i şer‘î üzere ba‘de’l-isbât ve’l-half mûcebince esb-i mezkûru geri ahz birle makbûzu olan semen-i mezkûr beş yüz yetmiş guruşu müdde‘î-i merkūm Ahmed’e redd ü teslîme mezbûr Ali’ye tenbîh olunduğu huzûr[-ı âlîlerine i‘lâm olundu] Fî 10 Receb sene [12]55