Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 62 Hüküm no: 15 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa’nın boşadığı hanımına nafaka ve mehir borcunu ödemesi Tatlîk i‘lâmı Ma‘rûz-ı dâ‘î-i Devlet-i aliyyeleridir ki İstanbul’da Samatya kurbünde Haccekadın mahallesinde sâkine mu‘arrefetü’z-zât zenciye Mavrova nâm-ı diğer Fâtıma bt. Abdullah nâm hatun İstanbul Bâb Mahkemesi’nde meclis-i şer‘de zevc-i mutallıkı Mestçi Ali Ağa b. Mustafa nâm kimesne muvâcehesinde merkūm Ali Ağa altmış bir guruş mehr-i müeccel tesmiyesiyle zevc-i dâhilim olup işbu târîh-i i‘lâm günü beni bâyinen tatlîk etmekle zimmetinde mütekarrir ve ma‘kūdün-aleyh mehr-i müeccel-i mezkûrum olan altmış bir guruşu hâlâ bana edâya ve iddetim inkızâsına değin beni infâka merkūm Ali Ağa’ya tenbîh olunmak murâdımdır deyü da‘vâ ettikde ol dahi cevâbında kaziyye minvâl-i muharrer üzere olduğunu ikrâr ü i‘tirâf etmeğin mûcebince mehr-i müeccel-i mezkûr altmış guruş[u] hâlen ve nafaka-i iddet-i ma‘lûme ve me’ûnet-i süknâsı mukābelelerinde beynlerinde bi’t-terâzî ta‘yîn olunan yetmiş guruş[u] dahi hîn-i istihkākda zevcesi müdde‘iyye-i mezbûreye edâ ve teslîme merkūm Ali Ağa’ya tenbîh olunduğu bi’l-iltimâs huzûr[-ı âlîlerine i‘lâm olundu] Fî 6 Receb sene [12]55