Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 63 Hüküm no: 16 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Nikola’nın Süleyman’dan satın aldığı atın ayıplı olduğu yolundaki iddiasını ispatlayamadığı Bârgir reddi Ma‘rûz Bakkāl tâifesinden arzuhâl eden Nikola v. Bretomos nâm zimmî İstanbul Bâb Mahkemesi’nde meclis-i şer‘de derûn-ı arzuhâlde mezkûrü’l-ism Süleyman b. Mehmed nâm kimesne muvâcehesinde târîh-i i‘lâmdan yirmi üç gün mukaddem cemî‘ uyûbdan sâlime olmak üzere merkūm Süleyman’ın mâlından ve yedinden sekiz yüz guruş semen-i medfû‘ ve makbûza iştirâ ve kabz eylediğim işbu meclis-i şer‘de mu‘âyene olunan bir re’s doru kısrak dîyk-ı nefes illetiyle mu‘ayyebe ve ayb-ı mezkûr şirâ târîhinden kadîm ve inde’t-tüccâr noksân-ı semen îcâb eder uyûbdan olmağla redd-i mebî‘ [ve] istirdâd-ı semen olunmak matlûbumdur deyü teveccüh-i husûmet bulundukdan sonra da‘vâ ettikde ol dahi cevâbında kısrak-ı mezkûru târîh-i mezkûrda müdde‘î-i mersûma cemî‘ uyûbdan sâlime olmak üzere sekiz yüz guruş semen-i makbûza bey‘ini ikrâr ayb-ı mezkûrun kıdemini inkâr etmekle müdde‘î-i mersûm ayb-ı mezkûrun şirâ târîhinden nazaran kadîm olduğunu isbâtdan izhâr-ı acz edip tahlîfe dahi tâlib olmamağın mûcebince müdde‘î-i mersûm Nikola zimmî da‘vâ-yı mezkûresiyle merkūm Süleyman’a bilâ-beyyine mu‘ârazadan men‘ [olunduğu] huzûr[-ı âlîlerine i‘lâm olundu] Fî 6 Receb sene [12]55